Një 55-vjeçar i shpallur në kërkim ndërkombëtar është ekstraduar nga Kroacia drejt Shqipërisë, pas bashkëpunimit të ngushtë mes Drejtorisë së Interpolit dhe autoriteteve kroate. I ekstraduari, shtetasi E. Sh., lindur në Maqedoninë e Veriut, akuzohet nga GJKKO si pjesë e një organizate kriminale që ka kontrabanduar mallra të akcizës, duke i shkaktuar shtetit dëm të konsiderueshëm ekonomik.
Sipas Policisë së Shtetit, ndaj 55-vjeçarit Gjykata e Posaçme e Shkallës së Parë për Korrupsionin dhe Krimin e Organizuar ka caktuar masën e sigurisë “Arrest në burg” me vendimin e datës 27 maj. Ai akuzohet për veprat penale: “Kontrabanda me mallra për të cilat paguhet akcizë”, kryer në kuadër të një grupi të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”.
Sipas hetimeve, E. Sh., në bashkëpunim me persona të tjerë, dyshohet se ka kontrabanduar cigare, duke i shkaktuar shtetit shqiptar një dëm financiar prej mbi 366 milionë lekësh.
Pas mbërritjes në Shqipëri, 55-vjeçari iu dorëzua Drejtorisë së Përgjithshme të Burgjeve, për ekzekutimin e vendimit të GJKKO-së.
“Në vijim të bashkëpunimit të ngushtë ndërmjet specialistëve të Drejtorisë së Interpolit, me homologët në Kroaci, u finalizua procedura për ekstradimin në Shqipëri, të shtetasit:
E. Sh., 55 vjeç, lindur në Maqedoninë e Veriut.
Ky shtetas ishte shpallur në kërkim ndërkombëtar pasi Gjykata e Posaçme e Shkallës së Parë për Korrupsionin dhe Krimin e Organizuar, me vendimin e datë 27.05.2025, i ka caktuar masën e sigurisë “Arrest në burg”, për veprat penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Shtetasi E. Sh. akuzohet se në bashkëpunim me shtetas të tjerë, duke vepruar si organizatë kriminale, ka kontrabanduar mallra (cigare) për të cilat paguhet akcizë. Me këtë veprimtari, ata i kanë shkaktuar shtetit shqiptar, dëm ekonomik 366 034 540 lekë“, thuhet në njoftim.
