Në kuadër të 113-vjetorit të shpalljes së Pavarësisë së Shqipërisë, më 28 Nëntor në qytetin e Elbasanit u organizua një ceremoni përkujtimore në nder të firmëtarit të Aktit të Pavarësisë, Aqif Pashë Elbasani.
Aktiviteti u zhvillua në një atmosferë solemne, me pjesëmarrjen e autoriteteve vendore, përfaqësuesve politikë, qytetarëve dhe nxënësve, duke e kthyer homazhin në një akt simbolik respekti për historinë dhe identitetin kombëtar.
Në ceremoni morën pjesë deputetët e Elbasanit Adi Qose, Aulona Bylykbashi, Sara Mile, Evis Kushi, prefekti i qarkut Ilir Bejtja, drejtuesi politik Arbjan Mazniku, kryebashkiaku Gledian Llatja, si dhe përfaqësues të pushtetit vendor.
Të pranishmit vendosën kurora me lule dhe zhvilluan homazhe në nder të patriotit elbasanas.
Kryetari i bashkisë Gledian Llatja, në fjalën e tij, përcolli urimet për Festën e Flamurit dhe Pavarësisë, duke theksuar se respekti për figurat e historisë është detyrim qytetar dhe institucional.
“Elbasani ka dhënë një kontribut të jashtëzakonshëm në themelimin e shtetit shqiptar dhe ky mesazh duhet të shërbejë si edukim për brezat e rinj,” u shpreh ai.
Edhe drejtuesi politik i qarkut, Arbjan Mazniku, në përshëndetjen e tij, vuri theksin tek mirënjohja ndaj firmëtarëve të Pavarësisë dhe rëndësia e unitetit.
“28 Nëntori është një ditë reflektimi dhe bashkimi, ndërsa projektet zhvillimore në Elbasan dhe në mbarë qarkun do të vijojnë me përkushtim,” tha Mazniku.
