Ndryshe nga disa muaj më parë, ku pjesëmarrja në masterklasin e mbajtur nga sopranoja e njohur me famë botërore Ermonela Jaho ishte e ulet, këtë herë duket se numri i aplikantëve është më i lartë.
Studentë, por edhe pedagogë, i janë bashkuar sopranos, e cila një pjesë të eksperiencës së saj skenike po e sjell edhe në Shqipëri.
“Aplikimet janë të shumta, ka pasur interesime nga shumë vende të botës dhe të rajonit, kjo është më tepër një bashkëpunim sepse dhe unë mësoj prej tyre, kthehem ne fillimet e mia, pra ndërveprojmë dhe përpiqem që eksperiencën time t’ua jap edhe atyre. Unë jam këtu dhe atë që kam për të dhënë do ta jap, kush do ta marrë le të marrë dhe kush do ta lërë, le ta lërë”, u shpreh sopranoja Ermonela Jaho.
Urta Haziraj është një prej pjesëmarrëseve të këtij edicioni dhe duke qenë soprano në Filarmoninë e Kosovës e sheh këtë si një mundësi për t’u rritur artistikisht si dhe për të krijuar ura bashkëpunimi me artistë të tjerë.
“Normalisht teknika e këndimit operistik është një nga teknikat më të vështira dhe për të arritur që të jesh shumë stabël në këtë teknikë, duhet të marrësh leksione të ndryshme. Çdo masterklas krijon lidhje me të rinj të tjerë, por më së shumti të takon me veten dhe me potencialin që ke, gjë të cilën e potencon dhe Ermonela”, u shpreh sopranoja Hazizaj.
“Vizion Plus” raporton se të qenit pjesë e skenës operistike kërkon më shumë sesa vetëm zërin lirik, ndaj Ermonela Jaho ka edhe një kërkesë drejtuar të rinjve, e veçanërisht atyre shqiptarë, për vazhdueshmërinë e karrierës së tyre artistike në Shqipëri.
“Nuk është vetëm rasti im, por edhe rasti i shumë artistëve të tjerë, kush ka provuar të studiojë apo të punojë jashtë, e di sa e vështirë është. Për të evituar që të largohen të rinjtë nuk po them që ne jemi arsyeja kryesore, por një ndër gjërat që duhet të japim është të sjellim eksperiencën tonë, atë që kemi marrë jashtë dhe jemi këtu ku jemi ta sjellim në Shqipëri. Se këtë teatër do ta bëjmë ne, nuk do ta bëjë askush tjetër, dhe nuk do e bëjmë duke ikur”, u shpreh sopranoja.
Për katër ditë me radhë, Ermonela Jaho do të presë talentet e rinj në masterklasin që po mbahet falas në Teatrin Kombëtar të Operës dhe Baletit, me synim përgatitjen e tyre jo vetëm për skenën shqiptare, por edhe atë të huaj.
