Është koha për themelimin e asociacionit të komunave me shumicë serbe. Kështu shkruajnë zyrtarët amerikanë Derek Chollet dhe Gabriel Escobar në një editorial të publikuar në mediat e Kosovës, duke sinjalizuar se Uashingtoni e ka humbur durimin me hezitimin e Prishtinës.
Këshilltari i departamentit amerikan të shtetit dhe i dërguari i posaçëm për Ballkanin thanë gjithashtu se mes qëllimeve më të rëndësishme të SHBA në Ballkanin Perëndimor është që të ndihmojnë në krijimin e kushteve “për marrëdhënie të shëndetshme, paqësore dhe të qëndrueshme mes Serbisë dhe Kosovës”.
“Gjatë javëve të shkuara, së bashku me Francën, Gjermaninë, Italinë dhe BE-në, kemi udhëtuar në Beograd dhe Prishtinë për të inkurajuar të dyja palët që të pranojnë propozimin e BE-së në mënyrë që të normalizojnë marrëdhëniet, të ndërkrejnë ciklin e krizave dhe konfrontimit, dhe të çojnë përpara me vendosmëri integrimin e tyre evropian. Kjo është mundësi historike që ne besojmë të dy palët duhet ta shfrytëzojnë”, deklarojnë Chollet edhe Escobar.
Por zyrtarët amerikanë theksojnë se ndër detyrat më kritike mbetet zbatimi i marrëveshjes për Asociacionin. Chollet dhe Escobar thonë se ka pasur shumë diskutime për Asociacionin, por tani sipas tyre, dhe ka ardhur koha të tregohet qartë se çfarë është ky Asociacion e çfarë jo.
“Në përgjithësi, Asociacioni do të ishte strukturë për komunat me popullatë me shumicë etnike serbe për të bashkërenditur çështjet dhe shërbimet si arsimi, kujdesi shëndetësor, planifikimi urban dhe rural dhe zhvillimi ekonomik lokal – me fjalë të tjera, funksionet për të cilat të gjitha komunat në Kosovë janë përgjegjëse”, ishin fjalët e tyre.
Ata thonë se e kundërshtojnë rreptësishtë krijimin e çfarëdo etniteti që i përngjan Republikës Serbe në Bosnjë dhe Hercegovinë dhe se bashkësia ndërkombëtare nuk po kërkon të imponojë një zgjidhje. Zyrtarët amerikanë kërkojnë nga Kosova që të ofrojë vizionin e saj për këtë asociacion dhe thonë se jemi të gatshëm të ofrojnë ekspertizë dhe mbështetje politike. Sipas tyre, Asociacioni nuk do t’ia shtonte qeverisë së Kosovës një shtresë të re të pushtetit ekzekutiv dhe legjislativ.
