Në një kohë me tensione të larta gjeopolitike – lufta në Ukrainë, konflikti i vazhdueshëm në Gaza dhe përplasjet tregtare me SHBA – Bashkimi Evropian ka marrë një hap strategjik për të forcuar kapacitetet e veta mbrojtëse: krijimin e një avioni të ri luftarak të gjeneratës së gjashtë.
Komisioni Evropian ka miratuar marrëveshjen për themelimin e një kompanie të përbashkët mes tre gjigantëve të industrisë së mbrojtjes: BAE Systems nga Britania, Leonardo SpA nga Italia dhe JAIEC nga Japonia. Kompania e re do të ketë seli në Mbretërinë e Bashkuar dhe do të drejtohet nga një ekzekutiv italian. Secila prej palëve do të zotërojë 33.3% të aksioneve.
Ky projekt, i njohur si Programi Global i Avionëve të Luftës (GCAP), synon të prodhojë një avion luftarak multifunksional që pritet të hyjë në përdorim në vitin 2035. Avionët do t’i shërbejnë ushtrive të Italisë, Britanisë dhe Japonisë, ndërsa Komisioni nuk përjashton shitjen edhe për vende të tjera në të ardhmen, shkruan A2 CNN.
Qëllimi kryesor i projektit është ulja e varësisë së Evropës nga pajisjet ushtarake amerikane, por gjithashtu edhe përballja me kërcënimin në rritje nga Rusia. Megjithatë, kjo nismë nuk konsiderohet si konkurrencë e drejtpërdrejtë me projekte të ngjashme që po zhvillojnë vende të tjera evropiane si Spanja, Franca dhe Gjermania.
Komisioni Evropian ka konfirmuar se marrëveshja nuk krijon konflikte interesi dhe nuk cenon konkurrencën, pasi nuk ka mbivendosje direkte mes aktiviteteve të kompanive në tregun e brendshëm evropian.
