Pas debateve që shkaktoi vendimi i presidentit amerikan Joe Biden, për të mos e zjgatur misionin e evakuimit nga Kabuli përtej 31 gushtit, sekretari i shtetit Anthony Blinken, përpiqet të sigurojë bashkëkombësit se nuk do të lënë pas asnjë qytetarë amerikane, të vendeve aleate apo afganë të tjerë në rrezik.
Përpjekjet për ti nxjerrë ata nga Kabuli nuk do të ndalen, edhe pas fundit të muajit, ishte premtimi i Blinken.
“Më lejoni të jem i qartë për këtë. Nuk ka asnjë afat në përpjekjet tona për të ndihmuar qytetarët e mbetur amerikanë, të cilët vendosn të largohen, bashkë më afganët që kanë qëndruar krah nesh për shumë vite. Kjo përpjekje do të vijojë çdo ditë, pas 31 gushtit. Ne do të përdorim çdo mjet që kemi në dispozicion, diplomatik apo ekonomik, për të ushtruar presion mbi talebanët në mënyrë që ata të lejojnë njerëzit të largohen nga vendi”, u shpreh Anthony Blinken, sekretari amerikan i shtetit.
Sekretari i Shtetit Antony Blinken tha se rreth 1500 amerikanë presin ende të evakuohen nga Afganistani, një shifër që sugjeron se kjo pjesë e operacionit ajror, udhëhequr nga Shtetet e Bashkuara, mund të përfundojë para afatit të vendosur nga Presidentit Joe Biden për largimin e plotë të trupave nga ky vend, më 31 gusht.
Ndërkohë me mijëra afganë në rrezik po hasin vështirësi të hyjnë në aeroportin e Kabulit. Blinken tha se Departamenti i Shtetit vlerëson se që prej fillimit të operacioneve të evakuimit më 14 gusht, ishin rreth 6,000 amerikanë që donin të largoheshin nga Afganistani dhe se deri tani rreth 4.500 prej tyre janë evakuuar.
“Rreth 500 amerikanë janë kontaktuar per të marrë udhëzime se kur dhe si të shkojnë në aeroportin e Kabulit. Krahas tyre, 1,000 te tjerë ose ndoshta më pak, po kontaktohen nëpërmjet të gjitha kanaleve, për të përcaktuar nëse duan të largohen.”
Sipas sekretarit amerikan të shtetit, mbi 82 mijë vetë janë evakuar deri më tani, 45 deri në 46 perqind e të cilëve, gra e fëmijë.
