Pandemia e COVID-19 kërcënon të ripërhapet në Europë, ku banorët po tundohen të ulin kujdesin dhe po fiton terren në SHBA ashtu si dhe në disa vende të Amerikës Latine.
Plazhet e tejmbushura në Angli nën valën e të nxehtit, fluturimet që rifilluan nga Paris-Orly, Europa po tenton të lehtësojë vigjilencën, ndërkohë që OBSH-ja parashikoi dje rreziqet për një valë të re në Kontinentin e Vjetër.
Provë e këtij kërcënimi të vazhdueshëm, Ukraina regjistroi sot 1 109 raste me koronavirusin e ri, një rekord, ndërkohë që përhapja e COVID-19 është përshpejtuar që prej heqjes së kufizimeve më 11 maj. Një valë e rëndë sipas autoriteteve që po përgatisin spitale të reja.
Në SHBA, përhapja e koronavirusit po progreson në Perëndim dhe kryesisht në Jug, veçanërisht në Teksas, në FLorida dhe në Kaliforni.
Teksasi, një prej shteteve të para amerikane që rihapi ekonominë, pezulloi dje procesin e lehtësimit të masave kufizuese.
Pragu prej 5 000 rastesh të reja u kalua për dy ditë me radhe dhe shtrimet në spital janë dyfishuar në dy javë.
“Kjo pauzë e përkohshme do të ndihmojë shtetin tonë të frenojë përhapjen”, deklaroi guvernatori republikan i Teksasit, Greg Abbott.
Ai pezulloi operacionet kirurgjikale jo thelbësore në qytetet e mëdha për të ruajtur kapacitetet pritëse në spitale.
Dje në orën 20:00 GMT, SHBA-ja numëroi më shumë se 37 000 raste të reja të diagnostikuara me COVID-19 dhe 692 të vdekur, sipas shifrave të Qendrës për Parandalimin e Luftën kundër Sëmundjeve (CDC).
Një valë e dytë dyshohet të rikthehet në vjeshtë dhe në dimër duke u bashkuar me gripin sezonal, por është një valë verore e cila po fillon.
Në total, pandemia ka shkaktuar 485 549 të vdekur në botë, sipas një bilanci zyrtar.
Pas SHBA-së, është Brazili që ka regjistruar më shumë të vdekur nga COVID-19, 54 971.
Meksika ka regjistruar 25 000 të vdekur dhe rreth 200 000 persona të kontaminuar me COVID-19 që prej fillimit të epidemisë në këtë vend me 127 milionë banorë, sipas autoriteteve.
Në Europë, OBSH-ja paralajmëroi kundër një vale të re që po vjen ndërkohë që autoritetet dhe banorët po përpiqen të kthejnë faqen e pandemisë që ndërpreu aktivitetin e kontinentit në pranverë.
“Numri i rasteve me koronavirusin e ri ka shënuar rritje në Europë”, theksoi sot Organizata Botërore e Shëndetësisë, që ngriti alarmin për gjendjen e sistemeve shëndetësore, tashmë nën presion, nëse kjo rritje pas lehtësimit të masave kufizuese nuk merret nën kontroll.
Pas tre muajve ndërprerje, aeroporti ”Paris-Orly” rinisi sot punën me fluturimin e parë me destinacion Portugalinë, pas rreth tre muajve ndërprerje për shkak të bllokimit të transportit ajror si pasojë e pandemisë.
Në Britaninë e Madhe, qeveria britanike i kërkoi sot popullsisë të respektojë rregullat e distancimit fizik në kuadër të përshpejtimit të përhapjes së koronavirusit të ri, ndërkohë që plazhet angleze janë tejmbushur për shkak të valës së të nxehtit.
Mijëra tifozë të Liverpulit shkelën rekomandimet shëndetësore për të festuar titullin e parë kampion të Anglisë për klubin që prej 30 vitesh para stadiumit “Anfield Road”
Në planin ekonomik, presidentja e Bankës Qendrore, Christine Lagarde theksoi se më e keqja kishte kaluar, duke këmbëngulur në faktin se rimëkëmbja do të jetë e paplotë dhe do të transformojë ekonominë.
Në Itali, deficiti publik arriti në 10,8% të PBB-së në tremujorin e parë, ndërkohë që gadishulli është prekur rëndë nga epidemia e koronavirusit, theksoi sot Istat (Instituti Kombëtar i Statistikave).
