Kompania amerikane e naftës “ExxonMobil” njoftoi sot se do të shkurtojë 1 600 vende pune deri në fund të vitit 2021 në Europë, ose pak më shumë se 11% të fuqisë punëtore të saj në kontinent, si pjesë e një uljeje të përgjithësuar të kostove, e përshpejtuar nga pandemia.
“Ndikimi i COVID-19 në kërkesën për produktet “ExxonMobil” e ka bërë punën e vazhdueshme në përmirësimin e efikasitetit të kompanisë edhe më urgjente”, shpjegoi kompania, që ka rreth 14 000 të punësuar në Europë.
“Europa mbetet një treg i rëndësishëm për “ExxonMobil”, siç kanë treguar investimet e mëdha të kohëve të fundit, megjithatë, tani duhen veprime të rëndësishme për të përmirësuar konkurrencën e kostos dhe për të siguruar që kompania të kapërcejë këto kushte të papara tregu”, vazhdoi ajo.
Kompania nuk dha hollësi për shpërndarjen gjeografike të shkurtimeve, por sqaroi se ato do të vareshin nga gjurma tregtare dhe kushtet e tregut lokal.
