Famullitari i Shkodrës, Dom Palaj, ka dhënë një mesazh të fortë për politikanët dhe shoqërinë shqiptare, duke dënuar korrupsionin, padrejtësinë dhe etjen për pushtet. Ai shpreh shqetësimin për degradimin e vlerave dhe pasurimin e disa individëve në kurriz të të tjerëve.
“Shoqëria jonë po rrënohet. Disa që dikur ishin bujarë, sot janë përfshirë në padrejtësi. Nuk është problem vetëm pasurimi i tyre, por varfëria e shpirtit që i ka pushtuar. Ata nuk shohin më përtej interesave personale dhe nuk përfitojnë nga natyra e tyre e vërtetë njerëzore, por vetëm grumbullojnë pasuri,” shprehet Dom Palaj.
Ai thekson se më e pafalshmja është kur babëzia çon në shkatërrimin e jetëve të të pafajshmëve, atyre që luftojnë çdo ditë për bukën e gojës. Sipas tij, ata që kanë shkaktuar varfëri dhe padrejtësi duhet të përballen me pasojat e veprimeve të tyre.
Duke cituar Krishtin, ai thekson: “Asgjë nuk mbetet e fshehtë, çdo gjë një ditë do të dalë në dritë.”
Ai foli edhe për domethënien e mbështetjes së vërtetë dhe vlerave që duhet të udhëheqin politikanët:
“Mbështetja nuk duhet të vijë nga provokimi apo nga një llogaritje e ftohtë. Kush i qëndron besnik Zotit, e kupton se e mira që bën për veten nuk është vetëm për të, por për gjithë njerëzimin. Krishti na mëson të qëndrojmë besnikë dhe të duam tjetrin pa kushte, sepse vetëm kështu e mira mund të triumfojë.”
