Albania

Faqja britanike: 5 arsyet pse duhet të vizitoni Shqipërinë këtë vit

Published

6 years ago

12 January, 2020

albnews

Në artikullin e një turisti britanik të publikuar në faqen online The Points Guy UK (https://thepointsguy.co.uk/about/) listohen pesë arsye për të vizituar Shqipërinë në vitin 2020, si dhe eksperienca e tij personale.

“Mund të them se ndoshta Shqipëria nuk është në listën tuaj të vendeve për të vizituar këtë vit. Në të vërtetë, nuk ishte as në listën time, por pres me padurim të rikthehem atje”, e nis shkrimin blogeri.

Gjatë nëntorit të vitit të kaluar shkova atje për të fituar pikët Tier të kompanisë British Airways. Për 209 paundë, duhej të zgjidhja mes Helsinkit (HEL), Tiranës (TIA) dhe Sofjes (SOF), ku nuk kam qenë kurrë më parë. Në përgjithësi kisha dëgjuar gjëra të mira për Tiranën dhe Shqipërinë, kështu që vendosa të shkoj atje dhe duhet thënë se u befasova.

Është lirë

Kur them lirë, e kam fjalën shumë lirë. Birra më e lirë që munda të gjej kushtonte 1,40 paundë. Ushqimi në restorante ishte shumë lirë. Një mëngjes hëngra një vakt të bollshëm e dy kafe dhe totali ishte 5 paundë.

Të ndalosh për të pirë kafe gjithashtu kushton shumë pak. Dy kafe dhe një shishe uji kushtuan më pak se 2 paundë.

Alkoli ishte gjëja më e shtrenjtë që blemë. Por dhe pijet ose koktejlet ishin rreth 7 paundë në zonën e Bllokut.

Për një udhëtim që zgjati tre ditë, shpenzova 100 paundë, përfshirë të ngrënat në restorante, alkolin, si dhe taksinë vajtje-ardhje nga aeroporti. Nëse do të isha treguar më i kursyer ndoshta do t’i kisha bërë të gjitha këto duke shpenzuar nën 50 paundë.

Plazhe të bukura

Në jug, në afërsi të kufirit grek, në Sarandë dhe Ksamil gjenden resorte shumë të bukura bregdetare. Në veri të kryeqytetit, Tiranës, vetëm 30 minuta larg saj, gjendet qyteti bregdetar i Durrësit.

Më në jug Ksamili është i mrekullueshëm. Me ujin e pastër si kristal do të mendoni se jeni në Karaibe. Rëra ishte e imët dhe e butë dhe perëndimet e diellit ishin fantastike.

Është relativisht e pazbuluar

Mungesa e turistëve në qytet është një nga gjërat që dallonte. Nuk mbaj mend të kem hasur francezë, spanjollë, grekë ose ndonjë gjuhë tjetër të flitej në rrugë. Si linguist, këto janë gjërat e para që vë re kur vizitoj qytete të reja. Nuk jam fare i rrjedhshëm në gjuhën shqipe, por e njoha dhe dhe ajo ishte gjuha kryesore që dëgjova gjatë qëndrimit atje.

Mungesa e turizmit në fund të nëntorit në Tiranë ndoshta ka kuptim. Megjithatë, në sezonin e verës kam përshtypjen se në qytetet bregdetare do të jetë ndryshe.

Restorante dhe kafene të mrekullueshme

Hëngra në çdo lloj restoranti në Tiranë për të kuptuar kuzhinën dhe kulturën e vërtetë shqiptare. Herën e parë hëngrëm në një restorant shumë të thjeshtë të quajtur Kernace Zgare Fatosi, jo shumë larg nga sheshi Skënderbej. Lokalet e vendosura buzë rrugës i jepnin vendit një ndjenjë të sofistikuar dhe ishin të mbushura me vendas që ndalonin për të pirë një birrë ose për të ngrënë diçka rrugës për në punë.

Menuja ishte kryesisht mish i pjekur në zgarë, gjë që dukej të ishte elementi kryesor kudo që shkonim. Porositëm disa gjëra ndryshe nga menuja dhe gjithçka ishte vërtetë e shijshme. Kur erdhi moment i pagesës u befasuam nga çmimi, dy birra dhe ushqimi i bollshëm kushtuan rreth 12 paundë.

Nga ana tjetër, një natë darkuam tek Restorant Piceri Era në Bllok. Si antipastë bëmë një përzgjedhje, por çfarë përzgjedhjeje. Kamarieri u përpoq të na shpjegonte sa më mirë gjithçka por u ngatërrua pak në përkthim. Gjithçka që hëngrëm ishte fantastike.

Si pjatë kryesore kamarieri na rekomandoi fërgesën shqiptare. Ishte shumë e shijshme. Do doja ta kisha ditur se përbërësi tjetër kryesor ishte qumështi i fermetuar.

Edhe në jug do të gjeni gatim të mirë. Ne shkuam tek Restoranti Guvat në Ksamil, që është zonë turistike dhe në sezonin e verës çmimet rriten. Tek Guvat një vakt i plotë me koktejle dhe verë kushton rreth 70 paundë.

Moti

Gjatë vizitës time në fund të nëntorit, temperaturat arritën rreth 18-20°C për tre ditë, dukshëm më ngrohtë se në Britaninë e Madhe. Temperaturat në dimër ulen më shumë, por në pjesën më të madhe të kohës nuk ka shumë reshje shiu dhe ka diell. Falë klimës mesdhetare, stina e verës në Shqipëri zgjat shumë, është e thatë dhe temperaturat arrijnë në 30 °C.

Për ta mbyllur, nuk kam asnjë gjë të keqe për të thënë lidhur me vizitën time në Shqipëri. Edhe salla e aeroportit ishte e mirë. Nëse po kërkoni vend të ri me ushqime të lira dhe të shijshme, si dhe plazhe të bukura, atëherë anuloni udhëtimin në Marbeja dhe shkoni në Shqipëri. Më besoni, nuk do të zhgënjeheni.

Albania

Gjykata refuzon sekuestrimin e 20 pasurive të Kristjan Boçit dhe Elman Abules

Published

5 hours ago

2 January, 2026

albnews

Gjykata e Tiranës, ka vendosur të mos sekuestrojë rreth 20 pasuri me vlerë gati 50 milion euro, për të cilat policia dhe prokuroria e kryeqytetit, ka pasur indicie të forta se vijnë nga aktiviteti kriminal i personave që i posedojnë ato.

Informacionet e siguruara nga gazetari Elton Qyno, tregojnë se miku i Erjon Veliaj, Elman Abule, që sot në Tiranë konsiderohet biznesmen i sukseshëm, në vitin 2004-2005, ka qënë në Belgjikë një hajdut i dhunshëm, duke përdorur çelësa të kopjuar dhe metodën e thyerjes.

Drejtoria e Interpolit në 12 shtator 2023 është informuar se Elman Abule rezulton i dënuar më datë 17 janar 2007, nga Gjykata e Antvvep, me 30 muaj burg për veprën penale të “Vjedhje me thyerje ose duke përdorur çelësa të kopjuar dhe krijim bande”, duke u dënuar ky shtetas me 2 vjet burg me kusht dhe 1 vit vit në burg për “krijim bande”.

Gjithashtu, rezulton se miku i Abules dhe ish-ortak me subjektin “Rametal” dhe shoqërinë tjetër “Ferro Chrome Holding”, ka qënë Kristian Boçi, i përfshirë në veprimtari të paligjshme dhe i arrestuar në vitin 2011 në Itali, i cili njihet për lidhjet e tij dhe me persona të tjerë të përfshirë në trafikun ndërkombëtar të narkotikëve si Eldi Dizdari.

Gazetari Qyno,ka mësuar se vendimi i mospranimit të kërkesës së prokurorisë, është dhënë pak ditë më parë nga gjyqtari i Tiranës, Altin Abdiu, i cili në fillim të muajit qershor 2025 u rikthye në funksionin e gjyqtarit nga Komisioni i Posaçëm i Apelimit.

Abdiu, refuzoi të sekuestrojë 20 shoqëri tregtare, dyqane, apartamente e vila me vlerë rreth 50 milionë euro, të cilat zotërohen nga Kristian Boçi, Elman Abule, mik i afërt i Erjon Veliaj, Vladimir Avramit si dhe 4 personave të tjerë të lidhur me këta persona.

Ndërkohë pritet që me zbardhjen e vendimit të gjykatës, prokuroria e Tiranës të ushtrojë Apelim në gjykatën e Apelit, duke kërkuar sekuestrimin e këtyre pasurive.

Albania

Stuhia Arktike mbërrin në Evropë: ç’mund të presë Ballkani?

Published

5 hours ago

2 January, 2026

albnews

Pas një periudhe moti më të qëndrueshëm të dominuar nga blloku i fortë Rex, i cili ruajti kushte relativisht të qeta dhe shpesh të buta në pjesën më të madhe të Evropës gjatë periudhës së Krishtlindjeve, rrethanat në atmosferë po ndryshojnë.

Ky sistem me presion të lartë po lëviz ngadalë drejt perëndimit, duke hapur rrugën që masat e ftohta ajrore Arktike të zbresin drejt pjesëve qendrore, lindore dhe jugore të kontinentit, shkruan Severe Weather.

Një rënie e ndjeshme e temperaturave

Ndërsa blloku i Rex-it tërhiqet, po formohet një model i ashtuquajtur dipolar moti, një anticiklon i fortë mbi Atlantikun dhe Evropën Perëndimore, ndërsa një ciklon thellohet mbi pjesët lindore dhe veriore të kontinentit.

Kjo lejon depërtimin e ajrit të akullt nga veriu dhe verilindja, i cili do të sjellë temperatura dukshëm më të ulëta dhe reshje bore të rastit para Vitit të Ri.

Sipas modeleve të parashikimit, masa e ajrit të ftohtë mund të jetë 10-15 °C nën vlerat normale për fundin e dhjetorit dhe fillimin e janarit, gjë që do të rezultonte në një rënie të ndjeshme të temperaturave dhe ngrica në shumë rajone. Lëvizja më e ftohtë e ajrit të ftohtë pritet praktikisht në të gjithë Evropën qendrore dhe lindore, dhe në disa zona temperaturat e mëngjesit mund të bien nën -10 °C.

Ndërsa temperaturat bien, mund të pritet borë në zonat veriore dhe lindore të kontinentit, ndërsa në zonat perëndimore si Mbretëria e Bashkuar dhe Irlanda, ajri i ftohtë do të kontribuojë gjithashtu në formimin e kushteve me borë në ditët e para të vitit 2026.

Rrotullimi i temperaturës

Pas ndërhyrjes fillestare të masës së ftohtë, kushtet atmosferike mund të bëhen përsëri më dinamike. Pritet që në të njëjtën kohë me rrymat më të ftohta veriore, rrjedha e ajrit më e ngrohtë, jugore do të kthehet gradualisht, veçanërisht përgjatë Mesdheut.

Ky kombinim i masave të ndryshme ajrore mund të çojë në modele të papritura të motit – nga ditët e ftohta dhe me borë në rajonet veriore deri te kushtet më të theksuara më të ngrohta dhe më të lagështa drejt jugut dhe jugperëndimit të kontinentit.

Shkurt, ditët e para të vitit 2026 mund të shënojnë fillimin e vërtetë të sezonit të dimrit, me një valë të dallueshme të ftohtë dhe episode bore, por edhe me mundësinë e ndryshimeve më të shpejta të motit ndërsa modelet atmosferike vazhdojnë të zhvillohen.

Ngrohtësia dhe shirat e rrëmbyeshëm po kthehen në Ballkan

Ndërsa perëndimi i Evropës do të ngrijë, situata në zonën tonë do të përmbyset plotësisht. Do të vendoset një rrymë e qëndrueshme jugperëndimore, e cila do të sjellë ajër dukshëm më të ngrohtë dhe më të lagësht nga Mesdheu drejt Evropës qendrore dhe lindore dhe Gadishullit Ballkanik. Kontrasti i temperaturës në të gjithë Evropën do të jetë i madh.

Në Ballkan dhe Evropën Lindore, temperaturat mund të jenë deri në 15 °C më të larta se mesatarja, dhe vlerat ditore do të arrijnë lokalisht 15 °C. Sasia e lartë e lagështisë do të sjellë edhe reshje të dendura shiu, veçanërisht në shpatet jugore të Alpeve dhe shpatet perëndimore të Dinarideve dhe Apenineve, ku gjatë javës mund të bien midis 150 dhe 300 milimetra shi.

Albania

Krijohet kompania shtetërore e transportit/ Balluku emëron administrator këshilltarin e saj

Published

5 hours ago

2 January, 2026

albnews

Ministria e Infrastrukturës regjistroi në Qendrën Kombëtare të Biznesit kompaninë shtetërore, e cila do të ofrojë shërbime të transportit publik. Përmes krijimit të kësaj kompanie, qeveria vendos të hyjë direkt në një sektor të rëndësishëm, i cili deri më sot ka qenë ekskluzivisht domain i kompanive private.

E pagëzuar me emrin Mobal, kompania do të ketë si objekt operimin e shërbimit të transportit publik rrugor të udhëtarëve, përfshirë destinacionet turistike. Paralelisht kompania shtetërore do të ofrojë edhe transportin e nxënësve dhe mësuesve

Por, Mobal nuk do të funksionojë vetëm si ofruese shërbimi, por do të ketë edhe shumë më tepër kompetenca, përfshirë edhe organizimin, licencimin dhe monitorimin e shërbimeve të transportit publik sipas legjislacionit në fuqi. Gjithashtu, do të zhvillojë dhe menaxhojë sisteme digjitale dhe aplikacione për mbikëqyrjen dhe informimin në kohë reale mbi shërbimet e transportit.

Sipas dokumentave të depozituara në QKB administratori i kompanisë është emëruar Henri Telharaj, i cili deri më tani ka mbajtur postin e këshilltarit të Belinda Ballukut. Kompania do të ketë një kapital fillestar prej 10 milionë lekësh, i disbursuar nga fondet e buxhetit të shtetit, ndërkohë që mbetet ende e paqartë se cilat linja do të operojë ajo.