Një inxhinier i Marinës amerikane dhe bashkëshortja janë arrestuar me akuzën për përpjekje për t’i shitur modelin e nëndetëseve bërthamore amerikane një fuqie të huaj, përfshirë në një kartë SD të fshehur në një sanduiç me gjalpë kikiriku.
Departamenti Amerikan i Drejtësisë (DoJ) tha se Jonathan dhe Diana Toebbe dyshohet se i shitën informacione në lidhje me projektimin e anijeve luftarake me energji bërthamore dikujt që ata besonin se ishte një përfaqësues i një fuqie të huaj.
”Personi ishte në fakt një agjent i fshehtë i FBI-së”, tha në një deklaratë departamenti.
Jonathan Toebbe, inxhinier bërthamor i Marinës, mbajti një leje aktive të sigurisë kombëtare, që i siguronte qasje në të dhëna të kufizuara.
Deklarata e ankesës pretendon se në prill 2020, Jonathan Toebbe i dërgoi një paketë një qeverie të huaj që përmbante një mostër të të dhënave dhe udhëzimeve.
“Deklarata gjithashtu pohon se, më pas, Toebbe filloi korrespondencën me email të koduar me një individ të cilin ai besonte se ishte përfaqësues i qeverisë së huaj. Individi ishte me të vërtetë një agjent i fshehtë i FBI-së”, shtohet në deklaratë.
Në qershor 2021, agjenti dërgoi 10 000 dollarë në kriptovalutë si një pagesë “me mirëbesim”.
Menjëherë më pas, Toebbes udhëtoi në një vend për të shkëmbyer informacion.
Atje, me Diana Toebbe duke vepruar si vëzhguese, Jonathan Toebbe vendosi një kartë SD të fshehur brenda gjysmës së një sanduiçi me gjalpë kikiriku në një vend të paracaktuar.
Një rishikim i kartës zbuloi se ajo përmbante informacion në lidhje me reaktorët bërthamorë të nëndetëseve. Ata do të dalin në gjykatën federale të martën.
