Federata e Futbollit të Anglisë (FA) planifikon ta zvogëlojë buxhetin vjetor për 85 milionë euro për të luftuar një deficit të mundshëm prej 340 milionë euro gjatë periudhës katërvjeçare për shkak të pandemisë COVID-19.
Kryetari i federatës Greg Clarke ka paralajmëruar edhe anëtarët e Këshillit të FA-t se do të duhet një kohë e konsiderueshme para se tifozët të lejohen në stadiume.
“Bordi është pajtuar që një shkurtim i arsyeshëm i buxhetit vjetor është 85 milionë euro. Në skenarin më të keq të mundshëm, kjo do të ishte e nevojshme për katër vjetët e ardhshëm për të mbuluar deficitin prej 340 milionë euro. Qartë se kjo do të ndikojë në planet tona pasi çdo sektor i lojës do të preket dhe do të preken edhe projektet që të gjithë i vlerësojmë. Nuk ka mënyrë tjetër dhe kërkoj nga të gjithë ju që të na ndihmoni në këtë plan të rishikuar”, ka shkruar Clarke në një letër publikuar në faqen zyrtare të federatës.
Këshilli pritet të takohet më 21 maj.
Futbolli profesionist është pezulluar që nga mesi i marsit për shkak të pandemisë së koronavirusit, që ka shkaktuar rreth 28.500 vdekje në Britani.
Klubet e Premier Leagues kanë mbajtur një video-konferencë të premten ku janë shikuar planet për t’iu kthyer stërvitjeve në maj pasuar nga kthimi i mundshëm i ndeshjeve pa shikues në qershor.
Ngjarjet e organizuara në stadiumin Wembley në stinorin 2018-19 kishin siguruar të hyra prej 80 milionë euro nga qarkullimi total i federatës prej 530 milionë euro.
Federata po ashtu kishte të hyra nga transmetuesit, të drejtat vendore dhe ndërkombëtare të ndeshjeve të FA Cup të Anglisë dhe të përfaqësueses së Anglisë, prej rreth 300 milionë euro.
“Realiteti është se ne nuk e dimë se si do të rrjedhin gjërat, por me distancën sociale që duhet aplikuar për një kohë të konsiderueshme, me përballemi me ndryshime substanciale në gjithë ekosistemin e futbollit. Si shembull është e vështirë të shihen turmat e tifozëve të kthehen në lojë në një të ardhme të afërt”, ka thënë Clarke.
