Takimet e kryetarit të PD Lulzim Basha kanë vijuar në fshatrat e Kukësit për t’u njohur me shqetësimet e fermerëve në Novosej dhe Shishtavec. Sipas banorëve të zonës, atyre ju mungon tregu i garantuar për të shitur prodhimet e tyre, ndërsa kostoja e prodhimit është gjithnjë e më lartë.
Banori: Nuk e dimë a do e shesim a jo, se edhe na kalbet në gropë dhe falimentojmë.
Basha: Fermeri i Kosovës, fermeri i Maqedonisë, e merr mbështetjen, subvencionohet, ndërsa fermeri shqiptar nuk arrin të konkurrojë as në tregun e brendshëm me prodhimet e veta sepse qeveria nuk është në krahun tuaj.
Banorët e Shishtavecit arrijnë të mbledhin të ardhura, për të jetuar nga bujqësia dhe blegtoria, por ato evidentojnë mungesën e krahut të punës, pas largimit të të rinjve në emigracion.
Banori: Nuk është vetëm problemi i patateve, ne kemi problem dhe blegtorinë, asnjë subvencion, asnjë mbështetje.
Basha: Me ne prioritet në buxhet do të jetë subvencionimi i prodhimeve tuaja. Në veçanti të prodhimeve cilësore. Shqipëria po mbytet në prodhime të subvencionuara të fermerëve të huaj.
Gjatë këtij takimi, Lideri i opozitës u premtoi banorëve të Kukësit se qeveria e ardhshme do të jetë në krah të tyre për t’i ndihmuar.
