Tunizia mund të përjashtohet nga Kupa e Botës nëse qeveria e këtij vendi vazhdon të ndërhyjë në çështjet e futbollit. Ky është paralajmërimi i FIFA-s për autoritetet tuniziane, që vjen pas komenteve të përsëritura të ministrit tunizian të Rinisë dhe Sporteve, Kamel Deguiche, për mundësinë e “shpërbërjes së zyrave federative”.
FIFA e konsideron deklaratën e tij si një përpjekje për të ndërhyrë në punën e Federatës së Futbollit të vendit (FTF) dhe i ka kërkuar atij sqarime për përpjekjet për të ndërhyrë në punët e saj të brendshme. FIFA i ka kujtuar gjithashtu FTF-së se shoqatat anëtare janë “të detyruara ligjërisht të veprojnë në mënyrë të pavarur dhe pa ndikimin e padrejtë të palëve të treta”.
“Çdo shkelje e këtyre detyrimeve mund të rezultojë në vendosjen e sanksioneve sipas ligjeve të FIFA-s, duke përfshirë pezullimin e shoqatës në fjalë”, tha Kenny Jean-Marie, drejtori i shoqatave anëtare të FIFA-s, në një letër drejtuar Sekretarit të Përgjithshëm të FTF, Ëajdi Aouadi.
Një pezullim i mundshëm do të nënkuptonte që asnjë klub apo ekip kombëtar tunizian nuk do të mund të luante në garat kontinentale apo ndërkombëtare. Muajin e ardhshëm tunizianët do të marrin pjesë në Botëror, në një grup me Francën, Danimarkën dhe Australinë.
FIFA i ka dhënë kohë FTF-së jo më vonë se të premten për t’iu përgjigjur qëndrimit të saj, pas komenteve të ministrit.
