Deputeti socialist, Bashkim Fino flet për problemet e brendshme në Partinë Socialiste dhe në qeverisje.
Fino thotë per Mapo se Rama duhet ta lexojë mirë duartrokitjen e Asamblesë kur shpalli Erjon Braçen zv.kryeministër.
Ish-kryeministri mbështet rikandidimin e Veliajt, por deklaron se ai do diskutohet në parti si gjithë të tjerët. Kritikat e Dades ndaj Ramës, Fino: Arta ka të drejtë
Bashkim Finon e gjejmë në zyrën e Komisionit të Ligjeve, ku sapo ka përfunduar mbledhja rutinë e së martës. Karrierën e tij politike në Partinë Socialiste e ka nisur si drejtues vendor i bashkisë Gjirokastër, për t’u bërë njeriu më i famshëm në vend në marsin e vitit 1997, kur presidenti i atëhershëm Sali Berisha e pranoi si Kryeministër të Pajtimit Kombëtar.
Ai ia atribuon këtë ngjitje, një pritjeje me nderim që ai, kryebashkiaku socialist, i kishte bërë Presidentit demokrat në qytetin e gurtë. Qëndroi Kryeministër për pak kohë dhe që prej asaj kohe është deputet i PS-së. U ka rezistuar të gjitha ndarjeve dhe furtunave që kjo parti ka përjetuar në pushtet dhe në opozitë, madje dhe ndryshimit të kupolës së saj. Sot ai tregon për gazetën Mapo se çfarë po ndodh me Partinë Socialiste dhe me Rilindjen, në vitin e 6-të të pushtetit të Edi Ramës.
