Deputetja demokrate, Oriola Pampuri, ka reaguar në lidhje me dokumentin e kryesisë së PD-së, që i hoqi Sekretarit të Përgjithshëm, Gazment Bardhi, të drejtën e përdorimit të vulës zyrtare të PD-së.
Në këtë dokument gjendet 2 herë firma e Pampurit, fakt sipas të cilit, Bardhi pretendon se dokumenti është i falsifikuar.
Por deputetja pampuri ka një tjetër argument që sipas saj, firma e hedhur 2 herë është një gabim njerëzor, sepse atë ditë ajo ka firmosur shumë dokumente, gjë që ka çuar dhe në ripërsëritjen e firmës së saj.
Pampuri pretendon se firma e hedhur 2 herë nuk përbën ndonjë vlerë të shtuar për korumin vendimarrës që duhet në kryesinë e PD-së.
“Firma ime e përsëritur gabimisht për shkak të një keqkuptimi mbi shkresat e ndryshme që u nënshkruan atë ditë, është „gjethja e fikut“ pas të cilës disa kërkojnë të fshehin disfatën e rradhës të revolucionit, me kosto të madhe për opozitën, e disa të tjerë kërkojnë të fshehin futjen nga dritarja në foltore, përmes një procesi skutash, ku flitet çdo ditë për statutin dhe veprohet në shkelje të tij“- shkruan Pampuri në faqen e saj në Facebook.
Sipas tij, për këdo që është i interesuar për aktet e Kryesisë, le t’i drejtohet institucioneve, nga të cilat doni titujt që mbani, por jo peshën e përgjegjësisë, të cilës i ikni kur duhen marrë vendime të vështira.
“U jam mirënjohëse demokratëve dhe u kërkoj ndjesë për shfaqjen e rradhës që u gatua për të kapur ndonje titull lajmesh apo për të bërë pis procesin e zgjedhjeve të 29 korrikut. E di që jeni lodhur, e ndjej mërzinë tuaj dhe dëshirën për të dalë nga kjo gjendje amullie, nga e cila përfiton vetëm Rama. Ndaj ju ftoj t’i lemë mënjëanë kotësitë dhe sherret e atyre që kanë hallin e listave dhe vendet e tyre në to, e të qëndrojmë me vendosmëri në mbrojtje të vlerave për të cilat kemi sakrifikuar të gjithë bashkë, të bindur se PD do të jete alternativa më e mire vetëm në partneritet të ngushtë me SHBA, BE dhe Britaninë e Madhe, në betejë frontale me korrupsionin dhe metastazat e tij të pangjyra. Për vendime, që mbrojnë sakrificën e demokratëve, orientimin e qartë euroatlantik, dhe në koherencë të plotë me qëndrimet e mia publike do të firmos pa nguruar.“- mbyll mesazhin Pampuri.
