Shumë autobusë kalojnë çdo ditë në pikën kufitare të Kapshticës drejt Greqisë.
Nuk janë të mbushur me turistë dhe as vizitorë ditorë. Është sezoni kur shqiptarët i pret vendi fqinj për punët e tyre të krahut. Kjo po ndodh çdo ditë e më shumë, në një kohë që në Shqipëri të moshuarit vuajnë për të mbledhur ullirin, mollët, rrushin, apo për të të bërë çdo punë tjetër në bujqësi.
“Unë jam nga Pojani edhe po shkoj në Selanik, bëj punë sezonale, punoj në një mandër drush atje, kam edhe pasaportën, shkojmë e shfrytëzojmë andej. Mundësisht bëjmë edhe ndonjë shtyrje, që të mos rrimë më këtu. Se këtu nuk rrihet. Iki në Greqi sepse këtu nuk ka asnjë lloj mundësie. Edhe n.q.s. gjen punë këtu, është 300 mijë lek rroga. Çfarë do bëj unë me 300 mijë lek?”, shprehet një i ri.
Por nuk janë vetëm të rinjtë. Drejt Greqisë largohen çdo ditë edhe burrat që janë në kufirin e moshës së mesme dhe asaj të tretë. Edhe ata nuk i shohin leverdi punës në vendin e tyre.
Teksa largohen çdo ditë për punë më të vlerësuar si rrjedhojë dhe jetë më të mirë se në Shqipëri, fajin e gjejnë te politikanët.
Në periudha të tilla, vetëm nga pika kufitare e Kapshticës kalojnë drejt Greqisë, minimalisht 100 persona në ditë për punë sezonale.
