Të paktën 22 shqiptarë janë deportuar nga Britania e Madhe mëngjesin e së mërkurës.
Në një fluturim të fshehtë për në kryeqytetin e Tiranës, u deportuan kriminelë dhe emigrantë të paligjshëm, raporton Daily Mail.
Sipas medias britanike, ky vendim u autorizua nga Ministrja e Brendshme, Suella Braverman në një përpjekje për të penguar shqiptarët që të hyjnë në Britani duke kaluar Kanalin me gomone nga Franca.
Shumica e të dëbuarve ndodheshin në qendrat e mbyllura të dëbimit ku ata qëndronin si kriminelë të dënuar ose për hyrje klandestine në Britani nga deti. Disa nga shqiptarët ndodheshin në kampin e Manston në Kent, që është përballuar me një numër në rritje të emigrantëve që mbërrijnë me varka.
Avioni me shqiptarët e deportuar mbërriti në aeroportin Nënë Tereza të Tiranës në orën 10 të mëngjesit të së mërkurës. Shqiptarët u dërguan më pas në një stacion policie në vend, raporton Daily Mail.
Pasaporta e secilit prej tyre është vulosur nga qeveria shqiptare që i ndalon të hyjnë në zonën Shengen të Evropës për tre vjet. Ata nuk mund të përdorin viza 90-ditore për të udhëtuar në BE, ku më pas do shkonin drejt Francës veriore ose Belgjikë për një kalim në Kanalin e La Manshit.
“Është goditja e fundit nga Braverman ndaj emigrantëve të paligjshëm dhe kriminelëve shqiptarë në MB’, raporton media.
Home Office këmbënguli për konfidencialitet të plotë në lidhje me fluturimin. Emrat e të dëbuarve nuk u vu në dispozicion të stafit të avionit gjatë udhëtimit.
“Numri i njerëzve që mbërrijnë ilegalisht në Mbretërinë e Bashkuar me gomone është në nivelin më të lartë të të gjitha kohërave”, tha ajo javën e kaluar.
Sipas Ministrisë së Brendshme, rreth 120 shqiptarë u dëbuan muajin e kaluar.
