Një ditë pas formimit të Qeverisë së kryeministrit Albin Kurti, Fondacioni Besa ka njoftuar se ekspertët e këtij fondacioni, kanë punuar në hartimin e një plani për arsimimin e të rinjve në Kosovë.
Ky plan është bazuar në arsimimin që zhvillohet në rajonin gjerman me ekonominë më të zhvilluar, Bavarinë.
Duke e uruar kryeministrin Kurti për detyrën e re, udhëheqësit e Besës, thonë se një bashkëpunim i sinqertë e i vyeshëm me diasporën, do të rezultonte me një zhvillim ekonomik të përshpejtuar në Kosovë.
Fondacioni Besa përkatësisht ekspertet në lëmin e sistemit dual shkollor, kanë përgatitur projekt propozimin për ndryshimin e sistemit arsimor kosovare, bazuar në sistemin dual bavarez.
“Projekti parasheh lidhjen efiçiente në mes të shkollave profesionale – Odës Ekonomike dhe kompanive të profesioneve të ndryshme. Sipas këtij projekti të rinjtë qysh prej moshës 16 vjeçare do të fillonin të punonin njëkohësisht, të shkollohen apo të marrin profesionin përkatës. Ndërsa Mjeshtrit në firmat private do të licencohen nga Oda Ekonomike për dhënien e profesionit tek të rinjtë. Me automatizëm të rinjtë do të kishin pagë nxënësi, vijim dyditore shkollore dhe 3 ditë pune praktike”, thuhet mes tjerash.
Siç thotë Ilir Seferi, ekspertët e Fondacionit Besa, kanë punuar në këtë projekt në mënyrë që të mund të fillohet menjëherë dhe të mos ketë kosto. Dhe sipas këtij fondacioni, është mënyra e vetme për motivimin e të rinjve dhe kthimit të trurit dhe lidhjes biznes-shkolla-profesion-treg.
