Dhjetë persona janë shpëtuar pasi një gropë e madhe u hap në një kanal të lundrueshëm në Shropshire, duke përfshirë disa anije dhe duke shkarkuar sasi të mëdha uji në tokat përreth.
Shërbimet e emergjencës shpallën një incident madhor pasi gropa, rreth 50 metra e gjatë, çau kanalin në West Midlands në Angli, duke lënë disa anije në buzë të një gremine të thellë ose të bllokuara në fund të saj.
Banorët lokalë thanë se fillimisht menduan se po ndodhte një tërmet, kur shembja nisi në orët e para të mëngjesit të së hënës, ndërsa kishte frikë se uji mund të përmbytej në qytetin e afërt të Whitchurch.
Sipas policisë nuk raportohet për viktima, ndërsa personat e prekur u ndihmuan nga shërbimi zjarrfikës. Në deklaratë thuhet se tre anije u përfshinë nga gropa, e cila kishte përmasa rreth 50 me 50 metra, dhe se ekipet ndihmuan më shumë se 10 persona të dilnin në siguri.
Zjarrfikësit punuan në kushte të vështira, me tokë të paqëndrueshme dhe ujë që lëvizte me shpejtësi, duke vendosur masa sigurie dhe duke reduktuar rrjedhën e ujit përmes pajisjeve speciale.
Rreth 12 banorë nga anijet e ankoruara pranë zonës u zhvendosën dhe u strehuan përkohësisht në një qendër emergjence në ish-stacionin e policisë në Whitchurch.
Menaxheri i zonës së shërbimit zjarrfikës, Scott Hurford, tha se incidenti madhor u shpall në orën 5:17, por deri në 8:30 situata ishte stabilizuar dhe nuk kishte më operacione kërkim-shpëtimi në vazhdim.
Një këshilltar lokal e përshkroi ngjarjen si “një krater shkatërrues”, duke theksuar se fakti që nuk pati të lënduar ishte “një mrekulli e vërtetë”, veçanërisht me festat e Krishtlindjes kaq pranë.
