Autoritetet greke kanë zbardhur disa raste të vendosjes së eksplozivit në vend dhe kanë identifikuar autorët, të cilët dyshohet se janë pjesë e grupeve kriminale të gjobvënies. Ngjarja e parë e zbardhur është vendosja e eksplozivit pranë një karburani në orët e para të mëngjesit të 8 marsit të këtij viti në Pire.
Shpërthimi i fortë që u dëgjua kilometra larg, shkaktari dëme të shumta në karburant dhe në automjete të parkuara. Për ngjarjen policia identifikoi dhe arrestoi shtetasin Geni Çato, 37-vjeç nga Përmeti dhe shqiptarin tjetër, i cili përdor emrat Evis, Ervis, Kostas, Kostantinos, Kristo dhe Ilia dhe mbiemrat Shyti, Rushiti, Boukouvalas, Prifti dhe Dhima dhe vitlindjet 1984 dhe 1987.
Ngjarja e dytë e zbuluar është vendosja e eksplozivit në 12 mars një kantinë vere në Kalithea, në pronësi të një biznesmeni që zotëron edhe një lokal nate e një bar-kafe. Për ngjarjen janë arrestuar Kristo Xhixho, 35-vjeç nga Durrësi dhe greku Antonis Karapasias, 39-vjeç.
Gjatë operacionit ka rënë në pranga edhe shqiptari Aristotel Stefanidhi, 23-vjeç nga Këlcyra. Ai dyshohet se ka marrë me automjet nga banesa Kristo Xhixhon dhe gjatë kësaj kohe ka qenë i armatosur me pistoletë.
