Një kolonë e madhe e luftëtarëve të dyshuar se janë të Wagner, ka mbërritur nga Rusia në një kamp të ri në Bjellorusi. Kjo është zbuluar nga imazhet e reja satelitore.
Analiza e BBC Verify tregon dhjetëra automjete që hyjnë në kampin në Tsel, një bazë ushtarake e papërdorur në Bjellorusinë jugore, rreth 103 km nga kryeqyteti Minsk.
Çfarë tregojnë imazhet më të fundit satelitore?
Kampi u shfaq për herë të parë pasi u arrit një marrëveshje për t’i dhënë fund kryengritjes së Wagner kundër ushtrisë ruse në fund të qershorit. Në një pjesë të marrëveshjes thuhet se trupat Wagner ranë dakord që të zhvendoseshin në Bjellorusi.
Imazhet e fundit tregojnë se Wagner ka filluar të lëvizë personelin ushtarak në një numër të madh ushtarësh. Imazhet e mëparshme satelitore të marra nga BBC Verify treguan për rreth 300 tenda që ishin ngritur në Tsel gjatë një periudhe dy javore.
Kanalet e lidhura me Wagner në Telegram, një platformë e njohur e mesazheve sociale, kanë postuar pamje që pretendojnë të tregojnë flamujt e grupit janë ulur në bazën e tyre kryesore të trajnimit në Molkino, në territorin jugor rus të Krasnodarit.
Ulja e flamujve ndonjëherë bëhet kur mbyllet një bazë ushtarake. Të martën, presidenti i Bjellorusisë, Alexander Lukashenko, një aleat i Rusisë, tha se Wagner “aktualisht janë në kampet e tyre” brenda vendit.
“Nëse Bjellorusia ka nevojë për to, ne menjëherë do t’i bëjmë thirrje kompanisë private ushtarake Ëagner për të mbrojtur kombin,” tha zoti Lukashenko.
Një imazh satelitor, i marrë më 17 korrik, tregon një kolonë automjetesh që dalin nga autostrada M5 e Bjellorusisë dhe shkojnë drejt kampit. Një tjetër imazh, i marrë në të njëjtën ditë, tregon një kolonë që mbërrin në kamp, përafërsisht në të njëjtën kohë.
Një video e postuar në mediat sociale tregoi një varg automjetesh që mbanin flamujt e Rusisë dhe të Wagner-it, duke u nisur drejt Tsel në të njëjtën autostradë.
BBC i ka vendosur pamjet gjeografike në karrexhatën e M5 në drejtim të veriut, jashtë qytetit të Babruysk, rreth 70 km në juglindje të Tsel. Kolona të gjata automjetesh me flamuj Wagner janë kapur gjithashtu nga brenda Rusisë duke u nisur drejt Bjellorusisë.
Sa trupa janë zhvendosur?
Aktualisht është e paqartë saktësisht sesa trupa po zhvendosen në Tsel. Gazeta investigative bjelloruse Hayun vlerëson se gjithsej 100 njësi, makina, kamionë dhe autobusë, dhe rreth 600 njerëz mund të kenë udhëtuar për në Tsel.
BBC Verify ka numëruar 31 automjete të mëdha, ndoshta kamionë, në pamjet që tregojnë kolonën që mbërriti në Tsel të hënën.
Në një fjalim drejtuar kombit rus më 26 qershor, pas përfundimit të rebelimit, Presidenti Vladimir Putin u ofroi luftëtarëve të Wagner zgjedhjen e nënshkrimit të kontratave me Ministrinë e Mbrojtjes Ruse, ose të ikin në Bjellorusi, bashkë me liderin, Yevgeny Prigozhin. BBC
