Franca e ka akuzuar Britaninë e Madhe për shantazh përmes menaxhimit të eksportit të vaksinave për Covid-19 në kohën e grindjeve të vazhdueshme rreth zinxhirit furnizues dhe mungesës së dozave.
Ministri i Jashtëm i Francës, Jean-Yves Le Drian, u pyet nëse Bashkimi Evropian është mashtruar duke dërguar miliona doza të vaksinës në Mbretërinë e Bashkuar përderisa programi i vaksinimit brenda bllokut po çalon.
“Ne duhet të ndërtojmë një raport bashkëpunues, por nuk mund të merremi me të kështu”, deklaroi kryediplomati francez. Franca ka bërë thirrje që BE-ja të zbatojë kontroll më të rreptë të eksportit të vaksinave, shkruan BBC.
Sipas tij, BE-ja nuk duhet ta paguajë çmimin për politikën e Britanisë për vaksinim. Ai gjithashtu e kritikoi qasjen ndaj blerjes së dozave, duke pretenduar se Britania do të ketë vështirësi për t’i siguruar dozat e dyta për personat që e kanë marrë dozën e parë.
“Mbretëria e Bashkuara është krenuar shumë me vaksinimin e mirë me dozën e parë, por ata kanë problem me dozën e dytë. Nuk mund të luhet me shantazh, nuk mund të luash kështu”, shtoi Le Drian.
Vaksinat po shpërndahen ngadalë në vendet e Bashkimit Evropian. BE-ja i ka fajësuar kompanitë farmaceutike, kryesisht atë “AstraZeneca”, për dështim që t’i ofrojnë dozat e premtuara, ndërsa vetë kompania britanike ka mohuar se nuk e ka respektuar kontratën.
BE-ja tash po pret që të marrë rreth 30 milionë doza të vaksinës së “AstraZeneca”-s deri në fund të marsit, që është më pak se një e treta e shifrës që e shpresonte më parë.
