Ministri i Jashtëm francez i ka kërkuar Turqisë që të mos i përzihet në punët e brendshme, pasi presidenti Recep Tayyip Erdogan bëri thirrje për bojkotimin e produkteve franceze, duke iu referuar agjendës së homologut francez, Emmanuel Macron, si “anti-islamike”.
Komentet e Erdoganit ishin të fundit në vazhdën e zemërimit të botës myslimane kundër shfaqjes së karikaturave të profetit Muhamed, që shumë myslimanë i konsiderojnë blasfemike.
Erdogani ka vënë në dyshim edhe shëndetin mendor të Macronit. Përplasja i ka rrënjët te sulmi me thikë para një shkolle franceze më 16 tetor, kur një burrë me prejardhje çeçene e preu në fyt mësuesin Samuel Paty, i cili ua kishte treguar nxënësve karikaturat kundërthënëse të profetit mysliman.
Megjithatë, Macroni, i cili ka takuar përfaqësuesit e komunitetit mysliman në Francë, është zotuar se do ta luftojë separatizmin islamik, duke theksuar se po rrezikon edhe disa bashkësi myslimane në shtetin francez.
Sidoqoftë, Franca u ka bërë thirrje shtetasve të saj që të kenë kujdes nëse jetojnë ose udhëtojnë në vendet me shumicë myslimane. Arabia Saudite ka dënuar karikaturat, por nuk i ka mbështetur thirrjet e disa shteteve myslimane për bojkotimin e mallrave franceze.
Ndërsa, lideri i Këshillit Francez të Besimit Mysliman u ka kërkuar besimtarëve që t’i anashkalojnë karikaturat që lejohen sipas ligjeve franceze.
