Udhëtarët në median sociale kanë shpjeguar se janë përballur me mungesën e ujit, ushqimeve, ajrit të pastër si dhe me vështirësitë e qëndrimit për 20 orë me maskë
Mijëra udhëtarë në Francë janë detyruar ta kalojnë natën në trenat e shpejtësisë së lartë për shkak të një defekti elektrik.
Mësohet se mijëra udhëtarë në 4 trenat e shpejtë që lidhin qytetin Bordeaux në jugperëndim të Francës, e kanë kaluar natën në trenat që mbetën pa lëvizur në shina për shkak të një defekti elektrik.
Udhëtarët në median sociale kanë shpjeguar se janë përballur me mungesën e ujit, ushqimeve, ajrit të pastër si dhe me vështirësitë e qëndrimit për 20 orë me maskë.
Ministri i Transportit, Jean-Baptiste Djebbari tha se për shkak të problemit të shkaktuar nga një defekt në kabllot elektrike në rrugën hekurudhore prej 60 kilometrash, Administrata kombëtare e hekurudhave (SNCF) do të paguajë një dëmshpërblim sa trefishin e biletës për të gjithë udhëtarët.
Pas disa orësh udhëtarët e bllokuar janë evakuuar gjatë natës dhe në mëngjes duke u transportuar në pikat e nisjes dhe më pas janë dërguar në pikën e arritjes me autobusë dhe trena të tjerë.
Lidhur me çështjen SNCF njoftoi se “përfshirë defektin e madh elektrik” ka patur probleme në më shumë se disa destinacione për të cilët nevojiten punime gjithëpërfshirëse rikuperuese dhe se rikthimi në normalitet nuk pritet deri më 1 shtator.
