Pasioni i Francesco Totti për padel ishte i dukshëm, por që ishte kthyer në biznes, jo edhe aq.
Vetëm një muaj më parë, ai dhe Luca Toni po sfidonin legjendat e futbollit në New York. Por lajmi për ish-kapitenin e Romës është se ai dhe i biri, Cristian, kanë krijuar një kompani.
Kjo lëvizje i ka mundësuar aksesin ndaj fondeve të Invitalia që janë të dedikuara për sipërmarrjet e të rinjve. Para publike me të cilat Totti, i cili ka një pasuri prej 50 milionë eurosh, po ndërton një qendër padeli me palestra e pishina në Via della Magliana, në periferinë jugore të Romës, shkruan “La Repubblica”.
Projekti i tij është ambicioz dhe përparon njësoj me jetën e tij personale: marrëveshjen e ndarjes të mbetur pezull me Ilary Biasi që tashmë i është bashkëngjitur apartamenti ku Totti jeton me Noemi Boçhi. Por në biznes duket se gjërat po shkojnë mirë pas një lëkundjeje fillestare.
Prania e dy partnerëve nën 35 vjeç është thelbësore. Falë tyre, kompania mundi të aplikonte për fondet “ON – Ndërmarrjet e reja me taksim zero” që mundësojnë financimin deri në 90% të shpenzimeve përmes granteve dhe kredive me zero interes që duhen shlyer brenda dhjetë viteve.
Aplikimi u miratua mes marsit e majit 2025, siç shprehet në deklaratën e fundit fiskale ku përfshihen faturat e shpenzimeve të para: sistemet elektrike, ndërtimi, noteria, inxhinieria, ngrohja, sinjalistika. Mes furnizuesve është Global Padel Court, një kompani e specializuar në ndërtimin e palestrave të padelit. Projekti do të zbatohet në Via della Magliana 370, në zyrat qendrore të familjes Zaffarani.
Ka një harmoni të fortë mes Tz Service dhe Ten Padel. Të njëjtat zyra, të njëjtat familje, të njëjtat qëllime për kompanitë. Edhe mbledhjet zhvillohen në të njëjtat ditë. Më 27 mars, në orën 2 të drekës, në Via della Magliana 370 u miratua deklarata fiskale e Tz Service. Një orë më vonë, u miratua edhe ajo e Ten Padel, e cila, pavarësisht moshës së re të administratorëve, mund të grumbullojë asete me vlerë 577 mijë euro.
Kur miratimi i incentivave të Invitalia mbërriti më 31 maj, Ten Padel miraton sërish deklaratën fiskale. Dokumentet përcaktojnë afatin e ndërtimit për kompleksin e padelit të financuar nga fondet europiane: “Puna pritet të përfundojë gjatë 2025, me inagurimin dhe nisjen e veprimtarisë në gjysmën e dytë të vitit.”
