Fredi Beleri, kryetari i zgjedhur i Bashkisë së Himarës do të mbetet në burg. Gjykata e Posaçme (GJKKO) ka rrëzuar këtë të martë (20 qershor) kërkesën e tij për masë më të lehtë sigurie.
Kujtojmë se Beleri u arrestua dy ditë para zgjedhjeve vendore të 14 majit, pasi u akuzua se u premtoi shuma monetare personave të ndryshëm me qëllim blerjen e votës.
Ndërsa bashkëpunëtori i tij Pandeli Kokaveshin u la nga GJKKO në “detyrim paraqitje”, për shkak të problemeve shëndetësore.
Beleri u arrestua më 12 maj, ndërsa hetimet ndaj tij kishin nisur më 9 maj pas referimit të rastit nga policia e Vlorës, dhe u mbështet me pamje filmike dhe përgjime pasi një agjent i infiltruar i policisë, përgjoi momentin kur bashkëpunëtorët Belerit dhanë 40 mijë lekë për 8 vota.
Në zgjedhjet e 14 majit Beleri, kandidati i koalicionit “Bashkë Fitojmë” u shpall fitues në Bashkinë Himarë përballë Jorgo Goros me një diferencë prej 19 votash.
Teksa përballet me drejtësinë, e paqartë mbetet procedura se si Fredi Beleri do të kryejë betimin si kryetar i zgjedhur i Bashkisë së Himarës.
