Zëvendësministrja e Arsimit, Albana Tole ka deklaruar se nisma e qeverisë shqiptare për të frenuar largimin e studentëve të mjekësisë dhe vetë mjekëve, nuk është një model që po praktikohet vetëm në Shqipëri, por edhe Gjermania po shikon mënyrën se si të ndalojë mjekët e saj të largohen për në Zvicër.
Duke folur në emisionin “Publikisht”, Tole theksoi se shumë shtete si Izraeli, vendet e Amerikës Latine, Irlanda kanë modelin e tyre për të frenuar ikjen e mjekëve.
Sipas saj, tashmë së fundmi edhe Gjermania po shikon të ndjekë këtë praktikë.
“Ne kemi marrë në konsideratë nevojën që ne kemi si vend për të larguar largimin dhe për të mbuluar nevojat që ne kemi me mjekë ka ardhur si nëpërmjet rritjes së numrit të kuotave në të njëjtën kohë dhe nëpërmjet incentivave dhe mekanizmave për të frenuar largimin.
Të gjitha iniciativat dhe masat shtrënguese janë nisma që nuk po ndërmerren vetëm në Shqipëri. Sigurisht që çdo vend parashikon modelet dhe praktikat e veta. Këto nisma janë ndërmarrë në Izrael, janë ndërmarrë në vende të Amerikës Latine, në Irlandë e kështu me radhë.
Të gjitha vendet po studiojnë mënyrat e tyre. Madje edhe Gjermania është duke parë mënyrën se si mund të frenojë largimin e mjekëve në Zvicër”, është shprehur Tole.
Ajo shtoi se “nga viti 2013 deri në vitin 2023 përqindja e mjekëve të cilët ushtrojnë profesionin e tyre ka ardhur në rritje. Por në rast se përqindja krahasohet me vendet e rajonit”.
