Në ligat më të mëdha, në derbit më të mëdhenj e në ndeshje të rëndësishme. Këtë fundjavë futbollistët shqiptarë kanë shpërthyer me gola si asnjëherë më parë në edicionin aktual.
Golat ishin të shumtë e disa prej tyre shumë të bukur. Disa prej futbollistëve kanë vazhduar me seri të shënimeve e disa kanë gjetur golin pas pritjes më të gjatë.
Dhe sërish është dëshmuar që ndikimi i futbollistëve shqiptarë po rritet në skuadra të ndryshme evropiane.
Ishte Astrit Selmani që paralajmëroi një javë të bereqetshme për futbollistët shqiptarë. Ai realizoi plot katër gola në elitën e Suedisë. Skuadra e tij, Hammarby, fitoi 5:3 ndaj Kalmarit, të shtunën në xhiron e fundit të Allsvenskan. Kështu 24-vjeçari arriti në shifrën e nëntë golave e shtatë asistimeve në 26 paraqitje këtë edicion. Ai edhe një herë dëshmoi se ka potencial, prej të cilit megjithatë shfaqi pak në rastet që i fitoi te Kosova.
Gola të shqiptarëve kishte edhe në Norvegji. Veton Berisha arriti në shifrën e 22 golave për Vikingun, që siguroi daljen në Evropë, një xhiro para fundit. Berisha shënoi një gol nga penalltia, të dielën në fitoren 3:1 ndaj Oddsit. Për Berishën ky edicion ishte shumë i suksesshëm. Skuadra e tij mban pozitën e tretë.
Golin e dytë të edicionit e shënoi Fitim Azemi. Skuadra e tij, Stabaek, pësoi 3:1 nga Rosenborgu.
Golat, si thuajse gjithnjë, nuk kanë munguar në Zvicër. Mirlind Kryeziu shënoi për Zuerichun, ndërsa Kastriot Imeri realizoi dy herë për Servetten. Pajtim Kasami shënoi në minutën e 95-të për barazimin e Baselit.
Në Superligën e Turqisë golin e gjeti Mërgim Berisha. Ai shënoi për skuadrën e madhe, Fenerbahçe, që fitoi 4:0 ndaj Rizesporit. Berisha tashmë ka dy gola e dy asistime në Superligën turke dhe po dëshmohet me potencial të madh.
Se ka potencial të jashtëzakonshëm ka dëshmuar sulmuesi i Shqipërisë, Armando Broja. Në ndeshjen e Premier Leagues, të shtunën, Broja shënoi për Southamptonin që barazoi 1:1 me Brightonin.
20-vjeçari ka tri gola në 11 paraqitje në Premier League. Kanë nisur thirrjet që Chelsea ta kthejë Brojën, të cilin e ka huazuar te Southamptoni. Broja shënoi gol shumë të bukur.
“Është mëkat që nuk fituam. Mendoj se kemi merituar të tri pikët. Mendoj se kemi dominuar ndeshjen, por është goditje nën brez e rëndë të pranosh gol në minutën e fundit. Kemi luajtur shumë mirë. Kemi mundur të shënojmë edhe gola të tjerë. Unë po ashtu kam mundur të shënoj gola të tjerë, por në një ditë tjetër e di që mund t’i zgjedh më mirë ato situata. Ne do të vazhdojmë të punojmë, të zhvillohemi”, ka thënë Broja pas ndeshjes.
Nuk ishte ky goli i vetëm i shqiptarëve në ligat e mëdha evropiane.
Rey Manaj shënoi në Serie A, të dielën. Ai shënoi për Spezian që barazoi 2:2 me Sassuolon. Për Manajn ishte goli i parë në këtë edicion të kampionatit italian dhe i pari në Serie A pas një kohe të gjatë. Dy gola në Serie A i kishte realizuar në vitin 2016.
Me “uljen” e nivelit në kategorinë e dytë e të tretë, lista e golave është shumë më e gjatë. Në ligën jo shumë të njohur të Qipros, Berat Sadik ka vazhduar me efikasitet, ndërsa Emir Sahiti ka shënuar gol në njërin prej derbive më të zjarrtë të Ballkanit. Ai shënoi për Hajdukun e Splitit që fitoi 2:0 ndaj Dinamos së Zagrebit. Madje ndeshja është luajtur në stadiumin e Dinamos, “Maksimir”. Rivaliteti mes Dinamos e Hajdukut është shumë i madh, ndonëse skuadra zagrebase ka dominuar plotësisht në dekadën e fundit. Por ky edicion po duket ndryshe. Hajduku e ka kaluar Dinamon në tabelë me fitoren në derbi. Splitasit kishin përkrahje të madhe të shikuesve të tyre, ndonëse në Zagreb.
Sahiti në lojë hyri në minutën e 88-të, ndërsa shënoi golin e dytë në kohën shtesë.
“Është ndjenjë fantastike të shënosh në derbin më të madh në Kroaci. Është një ndjenjë e mirë, pasi dihet rëndësia e kësaj ndeshjeje. Mund të them që është e rëndësishme që kemi arritur ta fitojmë derbin dhe shpresoj të vazhdojmë kështu edhe në takimet e tjera. Personalisht shpresoj të vazhdoj me gola e asistime. Do të jap maksimumin”, ka thënë Emir Sahiti për KOHËN.
Kishte festë të madhe në Zagreb e në Split për fitoren e Hajdukut, të cilin e përkrah “Torcida” e famshme.
Ndërkohë sulmuesi kryesor i Kosovës, Vedat Muriqi, vazhdon të vuajë për të gjetur golin. Ai luajti të dielën për Lazion, por pa qenë konkret.
