Roja bregdetare e Greqisë ka mohuar pretendimet në rritje se mund të kishte parandaluar fundosjen e varkës në Mesdhe, ngjarje e regjistruar më 14 qershor, ku për pasojë humbën jetën dhjetëra persona.
Autoritetet greke janë kritikuar ashpër se nuk kanë vepruar më herët pasi u zbulua se një anije e rojës bregdetare greke e shoqëroi varkën, e cila u nis nga Tobruku në Libi më 10 qershor, për orë të tëra.
Sipas zyrtarëve, njerëzit në varkë refuzuan vazhdimisht ndihmën dhe ishin të vendosur të arrinin në Itali, por ekspertët ligjorë dhe grupet e ndihmës i kanë konsideruar pretendimet e tyre si “justifikime”.
Roja bregdetare greke ka deklaruar se ishte njoftuar për praninë e varkës të martën në mëngjes dhe u vu re nga një helikopter se ajo “lundronte në një kurs të qëndrueshëm”. Më pas, sipas tyre, kanë komunikuar me një person në varkë, duke pretenduar se pasagjerët kishin nevojë për ushqim dhe ujë, por donin të vazhdonin rrugën për në Itali.
“Ishte një varkë peshkimi e mbushur me njerëz, të cilët refuzuan ndihmën tonë sepse donin të shkonin në Itali,” tha zëdhënësi i rojës bregdetare, Nikos Alexiou.
Autoritetet e monitoruan anijen për rreth 15 orë para se të mbytej, me anijet tregtare që gjithashtu e vëzhgonin dhe dërgonin furnizime deri në orët e para të mëngjesit të së mërkurës. Por më pas, sipas deklaratës së rojës bregdetare, anija filloi të lëkundet fuqishëm dhe u fundos. Ekspertët e rojës bregdetare besojnë se mund t’i ketë mbaruar karburanti ose të ketë pasur probleme me motorin dhe se pasagjerët që lëviznin brenda e bënë atë të përmbysej.
Evangelos Tournas, ministri i përkohshëm i Greqisë për mbrojtjen civile, i doli në mbrojtje rojës bregdetare, duke thënë se ajo nuk mund të ndërhynte në ujërat ndërkombëtare pa një kërkesë për ndihmë. “Një ndërhyrje nga rojet bregdetare mund të kishte vënë në rrezik një anije të mbingarkuar, e cila mund të përmbysej si rezultat,” tha Tournas.
Megjithatë, operacioni ka krijuar polemika politike dhe ka ndezur protesta në Athinë që u shoqëruan edhe me dhunë të enjten.
Autoritetet greke kanë konfirmuar se trupat e pajetë të78 persona janë nxjerrë, ndërsa rreth 500 të tjerë rezultojnë të zhdukur. 104 persona janë të mbijetuar, kryesisht nga Siria, Egjipti dhe Pakistani, ndërsa kërkimet vazhdojnë./ The Guardian
