Në një tjetër takim për Ukrainën në orët e para të së premtes, Këshilli i Sigurimit ka argumentuar se transferimi i armëve në Ukrainë sipas të dhënave të bëra transparente ka qenë i ligjshëm dhe i justifikuar për kauzën e duhur.
Duke mbrojtur këtë qëndrim, Shqipëria argumentoi se lufta e popullit ukrainas po bëhet për të mbrojtur vendin, sovranitetin, lirinë dhe pavarësinë e tij, siç parashikohet edhe në parimet thelbësore të Kartës së OKB-së dhe Aktit Final të Helsinkit, përfshirë edhe faktin që kufijtë nuk mund të ndryshohen me forcë.
“Ne ritheksojmë se neni 51 i Kartës së OKB-së ofron një bazë ligjore shumë të qartë për shtetet individuale për t’i ofruar çfarëdo ndihme një vendi që ushtron të drejtën e tij të natyrshme për vetëmbrojtje, në mbrojtje të sovranitetit dhe integritetit të tij territorial. Para Këshillit të Sigurimit, Shqipëria ka kujtuar faktin që nga ana tjetër është Rusia e cila po përdor armë të blera ilegalisht,” tha përfaqësuesi shqiptar në Këshillin e Sigurimit, Arjan Spasse.
“Rusia, një anëtare e përhershme e Këshillit të Sigurimit po përdor armë të blera ilegalisht nga Koreja e veriut dhe Irani, duke shkelur në mënyrë flagrante Rezolutat e Këshillit të Sigurimit të OKB-së. Shqipëria është përafruar me Vendimin e Këshillit të BE-së të 20 korrikut 2023 për një kuadër të ri sanksioni në funksion të mbështetjes ushtarake të Iranit ndaj Rusisë, i cili ndalon eksportin nga BE-ja në Iran të komponentëve të përdorur në zhvillimin dhe prodhimin e UAV-ve. Ai gjithashtu parashikon ndalimin e udhëtimit dhe masat e ngrirjes së aseteve që mund të vendosen kundër personave përgjegjës për mbështetjen ose të përfshirë në programin e dronëve të Iranit,” tha më tej Spasse.
Sipas raportit të fundit të Zyrës së Komisionerit të Lartë të OKB-së për të Drejtat e Njeriut, vetëm gjatë dy javëve të para të këtij muaji, nga agresioni janë vrarë 48 civilë dhe 210 të tjerë janë plagosur. Ndërkohë që dëmet që po shkakton rusia nuk po ndëshkojnë vetëm ukrainasit, ka kujtuar përfaqësuesi shqiptar Arjan Spasse. Ndërsa raketat ruse po shkatërrojnë qindra mijëra tonë drithë në rajonin e Odessa, të cilat duhet të ishin dërguar përmes korridorit të grurit, uria dhe varfëria do të godasin vendet më të cenueshme në Afrikë dhe Azinë Juglindore.
