Policia franceze ka dhënë alarmin për një rritje të ndjeshme të vdekjeve ndërmjet njerëzve që përpiqeshin të kalonin Kanalin e La Manshit ose Kanalin Anglez me varka të vogla.
Këtë vit nëntë persona janë mbytur duke tentuar ta kalojnë, krahasuar me 12 për të gjithë vitin 2023. E fundit që vdiq ishte një vajzë 7-vjeçare nga Iraku, një javë më parë, kur varka e një kontrabandisti u përmbys.
Por një debat i mprehtë po shfaqet gjithashtu se si të shpjegohet dhe kush duhet fajësuar për numrin në rritje të vdekjeve. Policia franceze thotë se gjithnjë e më shumë bandat e kontrabandës po i detyrojnë emigrantët, gjatë gjithë vitit, të hyjnë në varka gjithnjë e më të mbushura me njerëz.
Por kritikët thonë se një vijë bregdetare më e “militarizuar”, e mbushur me pajisje të reja policie të paguara nga Britania e Madhe, po i detyron njerëzit të ndërmarrin rreziqe gjithnjë e më të mëdha në vendosmërinë e tyre për të kaluar Kanalin.
Muajt e fundit, qyteti i vogël turistik i Ëimereux, në jug të Calais, është shfaqur si një pikë qendrore për kontrabandistët, me qindra emigrantë nga Iraku, Sudani, Vietnami dhe gjetkë, që mblidhen në netët e kthjellta me shpresën e një kalimi të suksesshëm.
“Ju mund të shihni kamerat dhe antenën,” tha kryetari i bashkisë Wimereux, Jean-Luc Dubaele, duke u treguar vizitorëve pajisje të reja CCTV të instaluara në 12 shtylla. Kamerat paguhen të gjitha si pjesë e një programi mbështetës trevjeçar, 480 milion paund në Mbretërinë e Bashkuar, i cili mbush një vit të dielën.
“Jam i bindur se kjo do të funksionojë. Është e domosdoshme. Natën e kaluar ne kishim 200 migrantë që erdhën në qytet. Ne po vëmë në shënjestër kontrabandistët, duke kërkuar për targat e makinave në ato vende ku ata lënë pajisjet e tyre,” tha zoti Dubaele, qyteti i të cilit është i pari që pajiset me kamerat e reja.
Disa nga pamjet CCTV do të shfaqen së shpejti, drejtpërdrejt, në një strukturë të re policie në qytetin francez të Lille, ku oficerët tashmë po monitorojnë kamerat me rreze infra të kuqe në distancë që skanojnë portet dhe plazhet e rajonit.
“Shumë e kësaj pajisje financohet nga Britania. Kjo na mundëson të ndërhyjmë më shpejt dhe më sigurt,” tha Mathilde Potel, komisionerja e policisë franceze që kryeson përpjekjet për të trajtuar çështjen e emigrantëve.
Ajo tha se ekipet e saj tani ishin në gjendje të identifikonin dhe kapnin varkat dhe pajisjet e tjera shumë kohë përpara se të arrinin në bregdet.
Por Potel shprehu shqetësimin për “tendencat shqetësuese që shfaqen këtë vit”.
Ajo përmendi 40 konfrontime në plazhe deri më tani këtë vit midis policisë dhe kontrabandistëve gjithnjë e më të dhunshëm, të cilët kanë filluar të furnizojnë emigrantët me “shkopinj dhe gurë për të sulmuar forcat tona dhe për të parandaluar kapjen e varkave”.
“Ne kemi më shumë armiqësi. Kështu që ne jemi të detyruar të përdorim gaz lotsjellës që të mos bëhemi vetë viktima,” tha ajo, duke treguar një video në telefonin e saj të një takimi të fundit.
