Gazetari dhe moderatori i njohur, Ilir Paço, ka çelur ekspozitën “The Pressure of Freedom” (Presioni i lirisë) me skica të vizatuara mbi fletët e lajmeve. Në një intervistë për Andri Xhahun në emisionin “Në radio”, Paço tregon se nisi të vizatojë pa kuptuar çdo ditë.
“Pasi i mbaroja, i lija aty. Vinte i merrte Vasoja, tekniku i zërit. I thosha me shaka ‘Vaso, mbaji, se do të duhen një ditë’. I mblodhi për një kohë të gjatë.”
Ndryshe kjo ekspozitë mund të ishte titulluar “Revoltë ndaj Vasos”.
“Një ditë, si çdo ditë tjetër kur merrte kokat e lajmeve, e shikoj që e kishte palosur pjesën e shkruar dhe po e griste. U revoltova si çdo njeri që krijon. Më tha që nuk më duhen këto, por vizatimet. I them që vizatimit i jep vlerë koka e lajmit, sepse e kthen në një skicë-ditar. Ai që lexon kokën sipër dhe shikon datën poshtë, lidh ngjarjen me kohën. Dhe i them me të qeshur që nuk do t’i jap më, sepse nuk tregove vlerësim dhe nuk i ruajte siç duhet. Që atëherë nisa t’i mbaja vetë dhe t’i grumbulloj.”
Ekspozita përmban 35 punime të realizuara gjatë edicioneve të lajmeve.
“Në momentin që hyn kronika unë vizatoj. Një pjesë e madhe janë mbaruar në studio dhe dallohen, sepse janë më të zhdërvjellëta dhe me më pak detaje. Më pas, kur u rritën pretendimet e mia, më shumë se 60–70 për qind janë punuar në studion e lajmeve, por meqë nuk të mjafton koha janë prekur edhe më vonë.”
I pyetur nëse ka një përgjigje për ata që mund ta kenë krahasuar me kryeministrin Rama për skicat mbi fletët e punës, Paço thotë:
“Të gjithëve aty u shkon mendja. U them me shaka se ‘unë jam më transparent se kryeministri’, sepse kokat e lajmeve lexohen, ndërsa që të arrish të lexosh ato që shkruhen në letrat e kryeministrit është e vështirë, pasi ai pikturon mbi to. Nuk është transparent aq sa jam unë. Kjo nuk është një shpikje e Edi Ramës. Kryeministri është ai që i dha më shumë bujë dhe e bëri më të njohur këtë lloj stili. Në Romë pashë që ishte hapur një ekspozitë me vizatime mbi partitura të Bob Dilanit (o. Dylan). Është në natyrën njerëzore që mjafton të kesh një stilolaps dhe një letër përpara: instinktivisht njeriu vizaton. Ai që është më fatlum, i cili ka talent, nxjerr një vepër.”
Ndonëse për publikun e gjerë Ilir Paço njihet si gazetar dhe moderator, qasja e tij ndaj pikturës nuk është e rastësishme. Ai ka mësuar për pikturë në Liceun Artistik “Jordan Misja”.
“Por si pjesa më e madhe e fëmijëve, më bezdiste koha e gjatë që rrinim në atelietë e liceut për të studiuar. Më mbyste qëndrimi gjashtë orë brenda duke pikturuar. Ndoshta kjo ndikoi që të ndërroja drejtimin duke studiuar për gazetari, por pa e humbur dashurinë që ekziston së brendshmi për pikturën.”
Ekspozita “The Pressure of Freedom” do të qëndrojë e hapur deri më 10 tetor në qendrën COD pranë kryeministrisë.
