Gazetarja britanike, Arabella Byrne, kujton fëmijërinë e saj me një shije të hidhur për mënyrën si u rrit, duke parë nënën e saj Julia Hamilton të luftonte me varësinë ndaj alkoolit.
Megjithëse Julia vinte nga një familje aristokrate skoceze dhe Arabella studioi në universitete të njohura si Oxford dhe Pennsylvania, të dyja kaluan jetën e tyre të hershme në kaos dhe vetëshkatërrim. Varësia ndaj alkoolit dhe trashëgimia e familjes ndikuan thellësisht në marrëdhënien e tyre dhe në zgjedhjet që bënë.
Arabella Byrne kujton se për herë të parë nëna e saj i dha verë kur ajo ishte vetëm 5-vjeçe. Ky ishte vetëm fillimi i rrugëtimit të saj drejt alkoolizmit. Ajo rrëfen se kujtimet më të hershme për mamanë janë të lidhura me tryezën e mbushur me shishe gjysmë të zbrazura dhe hidhërimin e përhershëm në sytë e saj.
Në adoleshencë, Arabella filloi të pinte rregullisht dhe shpesh shkonte e dehur në shkollë. Shpesh, i ati i sa, gjithashtu alkoolik, e ftonte për të pirë së bashku, duke i shtuar konfuzionin dhe pasigurinë për vendin e saj në botë.
“Vetëm kur pinim së bashku ndihesha afër me prindërit e mi. Dehja bëhej një mënyrë për të “ndezur dritat në errësirë”, kujton ajo.
Julia e kuptoi vetëm pas shumë viteve se varësia ndaj alkoolit i kishte shkatërruar jetën. Kur ajo ishte në moshën 53-vjeçare, mjekët i sugjeruan të bënte një skaner për mëlçinë. Ky ishte momenti kur Julia e kuptoi që vazhdimi i pijes mund t’i rrezikonte jetën.
Arabella dhe Julia tashmë janë të dyja të kuruara dhe shkojnë rregullisht në takimet e “Alkoolistëve Anonimë” ku për herë të parë, ndihen të bashkuara jo nga alkooli, por nga dëshira për të shpëtuar jetën e njëra-tjetrës.
Përmes librit të tyre “In the Blood,” ato shpresojnë të thyejnë heshtjen që rrethon alkoolizmin në familje, duke treguar për brezat e ardhshëm se ka një rrugëdalje nga errësira. Ato kërkojnë që historia e tyre të thyejë heshtjen rreth varësisë dhe të frymëzojë gjeneratat e ardhshme për të mos rënë në të njëjtën kurth.
