General Electric (GE) njoftoi largimin nga puna të 10 000 punonjësve në sektorin e aviacionit, për shkak të pandemisë së COVID-19 që ka bllokuar transportin ajror dhe porositë e avionëve, për të cilët prodhon motorët.
“Këto largime do të bëhen përmes nisjeve vullnetare ose pushimeve nga puna, dhe do t’i shtohen valës së parë prej 2 600 punonjësish të larguar nga puna në muajin mars”, theksoi grupi amerikan në një komunikatë.
Në total, GE do të zvogëlojë fuqinë punëtore në aviacion me një të katërtën (25%), ose 13 000 vende pune.
Kjo masë shtrënguese që përfshin të gjitha zonat gjeografike, pasqyron gjendjen e vështirë që po kalon i gjithë sektori aeronautik.
Prodhuesi i avionëve Boeing njoftoi javën e kaluar humbjen e 16 000 vendeve të punës, ose 10% të forcës së saj të punës në avionët civilë.
