Aktori i njohur francez, Gerard Depardieu, do të dalë në gjyq për akuzat për përdhunim dhe sulm seksual ndaj aktores Charlotte Arnould, ngjarje që dyshohet se kanë ndodhur në gusht të vitit 2018 në shtëpinë e tij në Paris. Aktorja, e cila ngriti padinë shtatë vite më parë, u shpreh se ndihej e lehtësuar që drejtësia po e trajton më në fund çështjen në mënyrë penale.
Depardieu, 76 vjeç, i ka mohuar akuzat, duke deklaruar se marrëdhënia me Arnould ishte konsensuale dhe se “kurrë nuk ka abuzuar me një grua”.
Rasti fillimisht ishte mbyllur për mungesë provash, por u rihap në vitin 2020 pasi Arnould u paraqit si palë civile në gjykatë.
Avokatja e saj, Carine Durrieu Diebolt, konfirmoi se Depardieu do të gjykohet për dy raste të dyshuara të përdhunimit me depërtim digjital. Data e gjyqit ende nuk është përcaktuar.
“Unë dhe klientja ime jemi të lehtësuar dhe të sigurt. Kjo është një formë e së vërtetës gjyqësore për Charlotte ndërsa ajo pret gjyqin penal“, tha ajo.
Ky është rasti më i rëndësishëm penal ndaj aktorit, i cili në maj të këtij viti u dënua gjithashtu për sulme seksuale ndaj dy anëtareve të një ekipi filmi, për çka u vendos në listën franceze të abuzuesve seksualë.