Nacionalizmi vaksinor përbën një dëm për të gjithë ne dhe nuk përbën mbrojtje për askënd, deklaroi drejtori i përgjithshëm i OBSH-së, Tedros Adhanom Ghebreyesus në një koment për ”Foreign Policy”.
”Aktualisht, ne jemi në garë me kohën. Zhvillimi i vaksinave të sigurta dhe efektive kundër Covid-19 në një kohë rekord përbën një dëshmi të jashtëzakonshme të aftësive të shkencës. Nëse vaksinat do t’i japin fund kësaj pandemie të tmerrshme, kjo është një provë e vullnetit politik dhe angazhimit moral të botës”, thotë Ghebreyesus.
”Kapaciteti aktual i prodhimit plotëson vetëm një pjesë të nevojës globale. Vaksinat janë shansi më i mirë për ta vënë nën kontroll këtë pandemi, por kjo vetëm nëse liderët nuk bien pre e nacionalizmit vaksinor”, theksoi ai.
”Nacionalizmi vaksinor nuk mund të mbrohet në aspektin moral. Ai është epidemiologjikisht vetëshkatërrues dhe klinikisht joproduktiv. Vetëm mekanizmat e drejtuara nga tregu janë të pamjaftueshme për të përmbushur synimin e ndalimit të pandemisë dhe arritjen e imunitetit të tufës përmes vaksinave”, tha ai.
”Lënia pa vaksina e shumicës së popullsisë së botës, jo vetëm që do ta zgjaste pandeminë, por edhe do të shtonte numrin e vdekjeve të panevojshme, dëmet ekonomike nga bllokimet dhe të provokonte mutacione të reja të Covid-19, që do të vazhdojë të përhapet midis popullatave të pambrojtura”, theksoi Ghebreyesus.
”Popullsitë dhe komunitetet e pambrojtura kudo që të ndodhen, do të vazhdojnë të vuajnë efektet dytësore të pandemisë. Bllokimet e vazhdueshme nënkuptojnë rrënim ekonomik, me më shumë njerëz që zhyten në varfëri”, tha shefi i OBSH-së.
”Për momentin asnjë vend nuk ka doza të mjaftueshme vaksinash. Por, mungesa e tyre në vendet e varfra është veçanërisht e tmerrshme. Për sa kohë që liderët botërorë po vendosin se jeta dhe jetesa e kujt duhet të jetë një prioritet, dhe për sa kohë që të gjithë përpiqen të sigurojnë doza të mjaftueshme vetëm për vete, të gjithë ne jemi duke e humbur këtë luftë”, theksoi ai.
”OBSH vlerëson se të paktën 30 000 punonjës të kujdesit shëndetësor kanë vdekur tashmë nga Covid-19. Që ta vendosim pandeminë nën kontroll, e vetmja zgjidhje e përhershme është të vaksinohen sa më shumë njerëz në të gjithë botën dhe sa më shpejt të jetë e mundur”, përfundon drejtori i përgjithshëm i OBSH-së, Tedros Adhanom Ghebreyesus në një koment për ”Foreign Policy”.
