Urimet nga mbarë bota vërshuan për kryeministrin britanik, Boris Johnson, që u shtua me një djalë.
Partnerja e tij, Carrie Symonds solli në jetë fëmijën e tyre në një spital në Londër.
Për Symonds, ky është fëmija i parë, por për Boris Johnson është një eksperiencë e njohur.
Sipas Daily Mail, Boris Johnson tani ka të paktën gjashtë fëmijë. Por ai nuk e ka konfirmuar zyrtarisht numrin e fëmijëve për shkak të historive të komplikuara të dashurisë.
Ai është martuar dy herë dhe të dy martesat kanë përfunduar për shkak të aferave.
Gazeta shkruan se deri tani dihet se Johnson dhe Marina Wheeler, me të cilën u nda në vitin 2018, kanë katër fëmijë bashkë: Lara Lettice, 26 vjeç, Milo Arthur, 24 vjeç, Cassia Peaches, 22 vjeç dhe Theodore Apollo, 20 vjeç.
Ai po ashtu ka edhe një fëmijë të pestë, Stephanie Macintyre. Ajo ka lindur nga afera e Boris Johnson me Helen Macintyre, një konsulente arti.
Stephanie mendohet se është një nga dy fëmijët që ai ka lindur si rezultat i aferave.
Gjatë një vendimi të vitit 2013, Gjykata e Apelit tha se publiku duhet ta dijë se ai është babai i një vajze të lindur jashtë martesës teksa ishte kryebashkiak i Londrës. Gjatë këtij vendimi u përmend mundësia e një fëmije të dytë të lindur jashtë martese.
Johnson u njoh me gruan e tij të parë, Allegra Mostyn-Owen kur ishin studentë në Oksford. Ata u martuan në vitin 1987 dhe u divorcuan në vitin 1993.
Ai u martua me Wheeler atë vit dhe pesë javë më vonë lindi fëmija e tyre i parë.
Në vitin 2004 u mësua se Johnson kishte një aferë me gazetaren Petronella Wyatt, e cila kishte mbetur shtatzënë dhe kishte abortuar.
Në vitin 2006 u raportua se Johnson kishte një aferë me gazetaren Anna Fazackerley.
Në vitin 2018 u publikua një tjetër skandal, pasi u mësua se Johnson kishte një aferë me zonjushën Symonds. Ai u nda nga e shoqja dhe brenda pak muajsh nisi të jetonte me Symonds.
