Dy ditë para mbërritjes në Tiranë të kancelares Angela Merkel, Qeveria Gjermane del kundër nismës “Open Balkan”, nëse në të nuk përfshihen të 6 vendet e Ballkanit Perëndimor, përfshi dhe Kosovën.
Gjermania mbështet çdo nismë të përbashkët ekonomike mes gjashtë vendeve të ballkanit Perëndimor.
Për të nisma “Open Balkan” është e paplotë nëse në të mungon qoftë dhe një prej këtyre vendeve.
Deklarata vjen nga Sekretari i Shtetit pranë Ministrisë së Jashtme Gjermane, Miguel Berger.
Në një intervistë për “Deutsche Welle”, Berger deklaroi se Gjermania kërkon forcim të qëndrueshëm të bashkëpunimit midis të gjashtë shteteve të Ballkanit Perëndimor.
Kjo është dhe qasja që po ndiqet në Procesin e Berlinit.
Berger: Në parim, natyrisht, çdo bashkëpunim rajonal në Ballkanin Perëndimor është për t’u përshëndetur. Por, nga ana tjetër, është e rëndësishme që bashkëpunimi rajonal të jetë gjithëpërfshirës dhe i hapur për të gjashtë vendet e Ballkanit Perëndimor. Me këtë kam parasysh si zhvillimin e ideve dhe nismave të reja, ashtu edhe zbatimin e tyre. Kjo është një qasje, për të cilën janë zotuar pjesëmarrësit në “Procesin e Berlinit” dhe të cilën e promovon edhe BE -ja.
Zyrtari i lartë në Ministrinë e Jashtme gjermane theksoi se tregu i përbashkët rajonal është projekt historik që duhet jetësuar
Berger: Ne shohim potencial të madh për rajonin, me anë të zgjerimit të mëtejshëm të bashkëpunimit rajonal. Përparimi në këtë fushë, siç është sidomos zhvillimi i Tregut të Përbashkët Rajonal deri në vitin 2024, e mbështet rrugën e gjashtë vendeve të Ballkanit Perëndimor drejt BE-së.
Vizita e kancelares Angela Merkel në Tiranë, do të mbahet ditën e martë, ku do të shihet mbështetja konkrete e bashkëpunimit rajonal brenda perspektivës së Bashkimit Europian.
Në Prishtinë pritet qëndrimi që Kancelarja do të mbajë mbi nismën “Ballkani i Hapur”, të cilën Kosova e kundërshton.
