Gjermania po vlerëson për herë të parë hipotezën e bujshme të një bojkotimi të Kampionatit Botëror të futbollit 2026 në Shtetet e Bashkuara, Kanada dhe Meksikë, si përgjigje ndaj kërcënimeve për aneksimin e Groenlandës të avancuara nga Donald Trump. Ai që ngre këtë temë është Jurgen Hardt, zëdhënës për politikën e jashtme i grupit parlamentar CDU/CSU, i cili e ka përkufizuar heqjen dorë të mundshme nga turneu si një “masë ekstreme” për ta rikthyer Uashingtonin në qëndrime më të moderuara.
“Bojkotimi i turneut do të merrej në konsideratë vetëm si zgjidhja e fundit për ta bërë presidentin Trump të reflektojë mbi çështjen e Groenlandës”, ka deklaruar Hardt për të përditshmen Bild, duke nënvizuar gjithashtu “se sa e rëndësishme është për të Kupa e Botës”. Fjalë që lidhin hapur sportin dhe diplomacinë, duke e shndërruar Botërorin në një mjet të mundshëm presioni politik.
Bojkoti, një opsion
Jurgen Hardt, zëdhënës për politikën e jashtme i grupit parlamentar CDU/CSU dhe bashkëpunëtor i afërt i kancelarit gjerman Friedrich Merz, ka hapur mundësinë e një bojkotimi të Botërorit 2026 në Shtetet e Bashkuara nga ana e Gjermanisë si “masë ekstreme” për ta dekurajuar Trump-in nga ideja e aneksimit të Groenlandës.
Afrimi i eventit botëror që do të mbahet në Amerikën e Veriut është shënuar nga një tension në rritje mes Shteteve të Bashkuara, Bashkimit Evropian dhe Danimarkës, pasi presidenti amerikan Trump ka ripërsëritur interesin strategjik për Groenlandën, duke mos përjashtuar edhe përdorimin e forcës. Një skenar që, sipas Berlinit, rrezikon të destabilizojë jo vetëm ekuilibrin evropian, por edhe besueshmërinë e NATO-s.
Hardt ka shprehur gjithsesi besim në mundësinë e një zgjidhjeje të përbashkët: “Do të arrijmë një kuptim më të mirë të përbashkët të sigurisë brenda NATO-s për sa i përket çështjes së Groenlandës”. Ai i ka përkufizuar gjithashtu si “të guximshme” nismat e fundit diplomatike të Danimarkës dhe Groenlandës dhe dërgimin e ushtarëve gjermanë në zonë.
Qeveria i kalon topin Federatës
Në frontin sportiv, qeveria gjermane mban një linjë të kujdesshme. Ministrja e Sportit Christiane Schenderlein ka sqaruar se vendime të mundshme nuk i takojnë politikës: “Shoqatat kompetente, në këtë rast DFB-ja (Federata Gjermane e Futbollit, shën. red.) dhe FIFA, janë përgjegjëse”. Kupa e Botës FIFA 2026 do të zhvillohet nga 11 qershori deri më 19 korrik 2026 mes Shteteve të Bashkuara, Kanadasë dhe Meksikës, dhe Gjermania është tashmë e kualifikuar.
Një bojkotim sot duket i pamundur, por vetë fakti që përmendet shënon një hap të paprecedentë. Nëse kriza mbi Groenlandën do të përkeqësohej, Botërori rrezikon të mos jetë më një festë globale, por simboli i një përçarjeje politike pa precedent mes Evropës dhe Shteteve të Bashkuara.
