Gjermania po organizon festime të mëdha për të përkujtuar Ludwig van Beethovenin në përvjetorin e 250-të të lindjes. Qindra koncerte muzikore dhe ekspozita janë planifikuar, dhe Qeveria madje e sheh këtë si një “detyrë kombëtare”.
Mbi 40 milionë euro (44 milionë dollarë) është shuma e fondeve që Qeveria gjermane ka ndarë për të festuar 250-vjetorin e lindjes së Ludwig van Beethoven. Viti i festimeve fillon të hënën, më 16 dhjetor, që besohet të jetë ditëlindja e tij e 249-të dhe përfundon më 17 dhjetor 2020.
Disa ditë para fillimit të festimeve, vizitorëve u ishte mundësuar një para-premierë e ekspozitës speciale “Beethoven. Bota. Qytetari. Muzika” në Galerinë Kombëtare të Arteve në Bonn dhe në shtëpinë e rinovuar ku kompozitori ishte lindur.
Festimet fillojnë të hënën, me një hapje zyrtare në Operën në Bonn. Koncerte, shfaqje të operave, festivale dhe ekspozita për nder të kompozitorit do të zhvillohen në të gjithë vendin gjatë gjithë vitit.
Malte Boecker, drejtori i Shoqatës së Përvjetorit të Beethovenit, i foli DW rreth nevojës për të organizuar festime të tilla dhe për të vlerësuar muzikën e Beethovenit. “Vetëm një pjesë e vogël e veprave të përgjithshme të Beethovenit janë mjaft të njohura”, tha Boecker. “Ne kemi iniciuar një numër projektesh që e paraqesin atë në kontekste të pazakonta përtej sallës së koncerteve”.
Kjo përfshin një seri koncertesh në të gjithë vendin gjatë fundjavës që i paraprin vitit të Beethovenit. “Ne kemi ftuar njerëz në Gjermani të hapin shtëpitë e tyre për koncerte dhe ngjarje private që lidhen me Beethovenin për të festuar në sallonet e tyre ose në kuzhinat e tyre. Mbi 800 mikpritës privatë janë përgjigjur. Është një festë e madhe për ditëlindjen”. Ky format, tha Boecker, i përshtatet më mirë ambientit të synuar të kompozitorit: “Muzika e tij kamertale nuk ishte e shkruar për sallat e koncerteve, por për performanca në shtëpi”.
Në fillim të vitit të përvjetorit dhe pas tre vjetëve të rinovimit të gjatë, shtëpia e Beethovenit në Bonn po rihapet për publikun si një muze.
Me rreth 100 mijë vizitorë në vit, njihet si muzeu më i vizituar në Gjermani. Dhe numri i vizitorëve do të rritet në vitin e përvjetorit. Muzeu brenda shtëpisë është restauruar.
Në vend që të tregojë artefakte nga jeta e kompozitorit në një mënyrë kronologjike, secila dhomë tani i është përkushtuar një teme, qoftë ajo rutina e tij e përditshme, personat më të rëndësishëm në jetën e tij, apo rutina e tij e punës dhe lufta për përsosmëri artistike.
Drejtoresha e muzeut Nicole Kämpken e përshkruan atë si një “qasje emocionale”. A do ta aprovonte Ludwig van Beethoven? “Unë sigurisht që shpresoj kështu”, ka thënë Kämpken, “sepse këtu mund ta njihni atë si qenie njerëzore. Në fund të fundit, Beethoven dëshironte të kuptohej. Ne përpiqemi ta arrijmë pikërisht këtë, nga këndvështrimi i njerëzve që vijnë këtu nga e gjithë bota”./DW
