Një shpërthim tronditi qendrën e qytetit gjerman të Këlnit herët në mëngjesin e sotëm, më 18 Shtator, duke lënë të paktën një të plagosur. Ngjarja ndodhi në një dyqan veshjesh në Ehrenstrasse, rreth orës 05:00, disa qindra metra larg klubit të natës “Vanity”, i cili ishte goditur nga një shpërthim tjetër ditën e hënë, më 16 Shtator.
Sipas raportimeve nga policia, një kalimtar 40-vjeçar ka pësuar lëndime të lehta dhe është intervistuar si dëshmitar. Autoritetet besojnë se shpërthimi ishte i qëllimshëm dhe po hetojnë mundësinë e një sulmi terrorist. Tani për tani, policia është në kërkim të të dyshuarit, dhe lidhjet mes këtyre dy rasteve janë pjesë e hetimeve në vazhdim.
Ky incident është një tjetër alarm për sigurinë në Gjermani, e cila ka përjetuar disa sulme të ngjashme në qytete të ndryshme, duke u përballur me fenomenin e njohur si “Xhihadi i ri”. Ky term përfshin individë, përfshirë fëmijë të mitur, që veprojnë si “ujqër të vetmuar”, duke përdorur mjete të thjeshta shkatërruese si eksplozivët dhe thikat për të realizuar sulme.
Autoritetet vazhdojnë të monitorojnë situatën dhe të forcojnë masat e sigurisë për të parandaluar incidente të mëtejshme. Detaje të reja pritet të dalin në ditët në vijim, ndërsa hetimet janë në zhvillim e sipër.
