Zvogëlohen shpresat për ta gjetur të gjallë sulmuesin argjentinas.
Hetimet për aeroplanin e zhdukur nga radarët, mbi kanalin e La Manshit, në mjetin ku fluturonte futbollisti Emiliano Sala, duket se kanë arritur në një pikë kthese.
Policia bregdetare e Guernseyt, zona britanike që mbulon territorin detar ku dyshohet se ka rënë aeroplani privat, ka gjetur mbetje që dyshohet se janë të mjetit që transportonte futbollistin e sapo blerë nga Cardiff City.
Sipas medieve angleze janë gjetur dy jastëkë që i përkisnin aeroplanit të vogël, të cilët rrymat detare dhe dallgët i kanë nxjerrë në breg të gadishullit të vogël të Cotentin, në Normandi.
Nga krahasimet e bëra, sendet janë të aeroplanit tip “Piper”, në të cilin udhëtonte ish-sulmuesi i Nantes, Emiliano Sala.
Në bashkëpunim me kërkuesit privatë, hetuesit britanikë kanë bërë të ditur se do të angazhojnë disa mini nëndetëse speciale për të gjetur mbetjet e aeroplanit, që dyshohet se ndodhen qindra metra nën ujë.
