6 ditë pasi Kuvendi i dha dritën jeshile SPAK për arrestimin e ish-zëvendëskryeministrit, Arben Ahmetaj, Gjykata e Posaçme ka miratuar këtë të enjte masën e sigurisë “arrest me burg”.
Menjëherë pas këtij vendimi, Prokuroria e Posaçme dorëzoi urdhërarrestin në polici dhe kërkoi informacion për vendndodhjen e tij. Me marrjen në dorëzim të urdhërarrestit, policia nisi kërkimet, ndërsa njoftoi të gjitha pikat e kalimit kufitar për ndalimin e tij.
Ish-zëvendëskryeministri akuzohet nga Prokuroria e Posaçme për korrupsion, pastrim parash dhe fshehje të pasurisë.
Hetimet për Ahmetajn nisën në Shtator për akuzën e shpërdorimit të detyrës për koncensionin e inceneratorit të Elbasanit, nga ku SPAK pretendon se ai ka marrë përfitime nga kompanitë koncesionare me administrator Klodian Zoto e Mirel Mërtiri.
Vetëm pak ditë më parë, po me miratim të Gjykatës së Posaçme, SPAK sekuestroi 4 banesa dhe dy llogari bankare në vlerën e 124 mijë Eurove në emër të Arben Ahmetajt.
Gjithashtu nga kontrolli në disa banesa prokuroria njoftoi se ka sekuestruar dokumente, laptopë e USB të vlefshme për hetimin. Pas këtij operacioni reagoi dhe vetë ish-zëvendëskryeministri, i cili përmes një postimi në Facebook u bëri thirrje autoriteteve të ndjekin fondet e inceneratorëve.
