Presidenti i Malit të Zi, Milo Gjukanoviç, i cili po qëndron për një vizitë dyditore në Maqedoninë e Veriut, deklaroi se vendi i tij e trajton Shkupin si pjesë të NATO-s.
Ai u pritur nga homologu i tij Stevo Pendarovski.
Pas takimit dypalësh dhe takimit të delegacioneve nga të dyja shtetet, dy presidentët kanë mbajtur një konferencë të përbashkët për shtyp, ku kanë theksuar marrëdhëniet e mira mes shteteve.
Pendarovski tha se kjo është vizita e parë e një presidenti të huaj që nga fillimi i mandatit të tij.
Ai theksoi se me presidentin Gjukanoviç kanë konstatuar se dy shtetet ndajnë prioritete dhe qëllime të njëjta në politikën e jashtme.
“Dy shtetet tona i lidh e kaluara e përbashkët, por edhe më tepër e ardhmja e përbashkët, udhëheqja e shteteve tona në rrugën drejt paqes dhe prosperitetit drejt Europës së bashkuar”, tha Pendarovski.
Presidenti i Maqedonisë së Veriut tha se mes dy shteteve nuk ka çështje të hapura si dhe rikujtoi se Mali i Zi ishte ndër shtetet e para që ratifikoi protokollin për anëtarësimin e Maqedonisë së Veriut në NATO.
Presidenti i Malit të Zi, Gjukanoviç, tha se ”nuk është e rastësishme që ai është lideri i parë që viziton vendin pas zgjedhjes së Pendarovskit, duke theksuar se kjo buron nga mirëbesimi mes dy shteteve”.
Ai tha se marrëdhëniet e mira datojnë nga koha e ish Jugosllavisë, duke theksuar se nuk do të ketë stabilitet në rajon pa integrim të plotë në NATO dhe BE.
“Si një njeri që ka udhëhequr shtetin e tij në rrugën drejt anëtarësimit në NATO dhe që e njeh mirë këtë fazë, me të vërtetë mund të them me siguri se ne jo vetëm në mënyrë miqësore, por edhe realisht Maqedoninë e Veriut e trajtojmë si pjesë të NATO-s, por kuptohet se ne e dimë se duhet të përfundohet me saktësi të përkryer edhe ajo që ka mbetur”, tha Gjukanoviç.
