Gjykata e Durrësit ka dhënë paraditen e sotme masën e sigurisë “Arrest me burg” për ish-gardistin dhe shoferin e Lindita Nikollës, Martin Nikolli dhe vëllanë e tij Alfred, të cilët fundjavën e kaluar ishin protagonistë të një konflikti të regjistruar në zonën e Hamallajt.
Ngjarja ndodhi të dielën e 30 korrikut, kur Martin Nikolli, shofer zëvendësues i kryeparlamentares Lindita Nikolla, dhunoi me shkopa bejsbolli djemtë e Pjetër Kaçit dhe më pas qëlloi në ajër me armën e shërbimit.
Ai u pezullua si gardist, ndërsa edhe u arrestua nga policia e Durrësit. Konflikti mes dy familjeve ka nisur prej disa muajsh për një rrugë që kalon pranë familjes Kaçi.
Sipas njërit prej djemve të Pjetër Kaçit, Paulinit, konflikti për rrugën vazhdon prej kohësh dhe ka përfunduar në prokurori. Anëtarët e familjes Nikolli janë kapur me fjalë me babanë e tyre të moshuar dhe më pas, pasi i kanë dalë në krah të bijtë, përplasja mes dy familjeve ka qenë fizike.
Një ditë më parë, gjykata e Durrësit lëshoi urdhër të menjëhershëm mbrojtjeje për Pjetër Kaçin dhe djemtë e tij, pas konfliktit që ata patën me gardistin Martin Nikolli dhe familjen e tij në Hamallaj.
Mbi dy të arrestuarit Martin dhe Alfred Nikolli rëndojnë 3 akuza “Kanosje”, “Plagosje e rëndë me dashje” dhe “Prishje e qetësisë publike”.
Pas ngjarjes së rëndë, ministri i Brendshëm Taulant Balla, njoftoi shkarkimin nga detyra të punonjësit të gardës.
