Aktori Johnny Depp dëshmoi për të dytën ditë të mërkurën për të përshkruar martesën e tij të trazuar me aktoren Amber Heard, të cilën ai e ka paditur për shpifje, duke e akuzuar atë për “fyerje” që shpesh përshkallëzohej në dhunë fizike.
“Niste me një shuplakë, me një shtytje, me hedhjen e një telekomande televizori në kokën time, duke hedhur një gotë verë në fytyrën time”, i tha aktori një jurie në gjykatën e qarkut Fairfax në Virxhinia. .
Heard e ka akuzuar Depp në dokumentet e gjykatës se e ka sulmuar atë në mënyrë të përsëritur gjatë gjithë marrëdhënies së tyre, nga goditja me shuplakë dhe shkelma e deri te zvarritja e saj prej flokësh nëpër dysheme dhe kapja e saj nga fyti, duke e bërë atë të frikësohej se ai do ta vriste.
Por, gjatë viteve të fundit të grindjeve ligjore në Shtetet e Bashkuara dhe Britani, Depp ka pohuar se ishte Amber Heard ajo që ishte e dhunshme ndaj tij. Në dëshminë e të martës, Depp mohoi të ketë goditur ndonjëherë Heard apo ndonjë grua.
“Ajo ka nevojë për sherr, për konflikt, ka nevojë për dhunë. Ajo shpërthen në tërbim për hiçgjë”, tha Depp.
Heard mohoi në dokumentet e gjykatës se ajo kishte goditur ndonjëherë Depp, përveçse në vetëmbrojtje, ose në mbrojtje të motrës së saj. Por, gjatë seancës u publikua një përgjim i Heard teksa i rrëfente një miku të përbashkët të çiftit se si e kishte goditur aktorin, në atë kohë bashkëshorti i saj.
Depp e ka paditur Heard për shpifje për një shkrim që ajo shkroi në vitin 2018, në të cilin ajo tha se ishte një “figurë publike që përfaqësonte abuzimin në familje”. Artikulli nuk përmendi emrin e Depp, por ai dëshmoi se referenca e kornizës kohore në op-ed ishte qartësisht në lidhje me martesën e tyre, e cila zgjati më pak se dy vjet.
