Qytetet si Madridi, Barcelona dhe Valencia nuk do të shkojnë në fazën tjetër të masave paraprake lehtësuese
Pak më shumë se gjysma e popullsisë së Spanjës po përgatitet për lehtësimin e masave të bllokimit, ndërsa vendi regjistroi 179 vdekje të tjera dhe 604 raste të reja me koronavirusin e ri (COVID-19) të shtunën, transmeton Anadolu Agency (AA).
Numri i vdekjeve dhe infeksioneve të reja ka shënuar një ulje të vogël nga e premtja, ndërsa një shifër shumë më të ulët se ato kulmore të regjistruara mbi një muaj më parë.
Në total, Spanja, një nga vendet më të goditura nga virusi në botë, aktualisht ka regjistruar afro 26.500 vdekje dhe 223.500 raste. Nga rastet e konfirmuara, më shumë se gjysma, apo 122.265, janë shtruar në spital dhe gati 134.000 janë shëruar.
Spanja ka qenë nën mbyllje të rreptë që nga 14 marsi, por shumë pjesë të vendit tani janë duke u përgatitur për zbutjen e kufizimeve të hënën.
Shumica dërrmuese e qeverive rajonale thanë se janë të gatshme të ndërmarrin hapin tjetër drejt një “normaleje të re”, por qeveria qendrore ka hedhur poshtë disa kërkesa.
Vendet si Madridi, Valencia, Barcelona, Granada dhe Malaga do të mbesin nën masat e bllokimit për të paktën një javë tjetër, njoftoi ministri i Shëndetësisë i Spanjës të premten në mbrëmje.
“Nuk jemi dakord me vendimin e Ministrisë së Shëndetësisë. Ne kemi arsyetuar pse i gjithë rajoni duhet të transferohet në fazën tjetër…Kërkojmë që çështja jonë të rishikohet sa më shpejt të jetë e mundur”, shkroi në Twitter Ximo Puig, presidenti i Rajonit të Valencias.
Në gjysmën tjetër e vendit, e cila ka përmbushur kriteret e nevojshme shëndetësore dhe epidemiologjike për lehtësimin e masave paraprake, do të lejohet hapja e dyqaneve të vogla, tarracave dhe restoranteve në natyrë të hapur të hënën për herë të parë për gati dy muaj. Gjithashtu do të lejohet takimi i grupeve deri në 10 persona.
Këtë fundjavë do të publikohen detaje më të plota rreth heqjes së kufizimeve.
“Është jashtëzakonisht e rëndësishme që ne të forcojmë përgjegjësinë dhe maturinë. Çdo gabim që bëjmë mund të nënkuptojë shpërthime të reja dhe rrezik të shtuar për shëndetin dhe jetën tonë”, u shpreh në Twitter Adrian Barbon, presidenti i Asturias, një nga rajonet veriore të Spanjës që do të lejohet plotësisht të kalojë në fazën tjetër të hënën.
Pas shfaqjes në Kinë dhjetorin e kaluar, COVID-19 është përhapur në të gjithë botën. Aktualisht, Evropa dhe SHBA janë rajonet më të goditura.
Pandemia ka marë mbi 275 mijë jetë në gjithë botën dhe ka infektuar më shumë se 4 milionë njerëz, ndërkohë që afër 1.4 milion janë shëruar.
