Shtatë emigrantë vdiqën dhe tetë të tjerë u lënduan në orët e hershme të së premtes, kur automjeti me të cilin po udhëtonin u përplas në një stacion për pagesën e taksës në një autostradë në pjesën veriore të Greqisë, tha policia greke.
Sipas hetimeve preliminare, drejtuesi i automjetit, i cili është duke u trajtuar në spital, ishte duke transportuar 14 emigrantë. Përkatësia kombëtare e pasagjerëve nuk ishte e ditur menjëherë, shkruan Reuters.
Greqia është njëra nga rrugët kryesore për në Bashkimin Evropian për azilkërkuesit nga Afrika, Lindja e Mesme e pjesë tjera të Azisë, të cilët futen në këtë shtet qoftë përmes lundrimit të rrezikshëm me barka nga Turqia drejt ishujve grekë, qoftë duke e kaluar kufirin tokësor verilindor grek me Turqinë.
