Autoriteti grek për pagesat bujqësore (OPEKEPE) ka shpërndarë 153 milionë euro ndihmë bujqësore nga Bashkimi Evropian që prej muajit shtator, bëri të ditur të Ministria e Zhvillimit Rural.
Shuma e fundit mbulon tre kategori të pagesave direkte, ndërsa fondet për tetë kategori të tjera janë planifikuar të disbursohen deri në fund të tetorit.
Mbi 61 milionë euro do të kalojnë në llogaritë bankare të 157,737 fermerëve. Ndërkohë, 25,138 aplikime, që përfaqësojnë rreth 13.7% të totalit, janë ende në proces shqyrtimi të mëtejshëm.
Që prej shtatorit, janë paguar gjithashtu rreth 90 milionë euro përmes masave të ndryshme të Programit të Zhvillimit Rural, duke e çuar totalin e ndihmës së shpërndarë në 153 milionë euro.
Në të njëjtën kohë, qeveria po zbaton masa të reja për të mbështetur fermerët. Ato synojnë të ulin kostot e prodhimit dhe të ndihmojnë blegtorët e prekur nga sëmundjet e kafshëve, duke përfshirë edhe rastet e therjeve masive për shkak të infeksioneve.
Ministria deklaroi se po ofrohet një lehtësim konkret për fermerët, duke garantuar njëkohësisht transparencë dhe përputhje me rregullat e BE-së dhe të shtetit.
Pagesat e ardhshme përfshijnë 58 milionë euro për ndihmë ushqimore dhe dëme, 80 milionë euro për ripyllëzime dhe 178 milionë euro në kompensime të lidhura me motin e keq të vitit të kaluar.
